Ils 3 d’avrigl 1897, pia avant 125 onns è mort a Vienna in dals pli impurtants cumponists da l'istorgia da musica: Johannes Brahms. Sias cumposiziuns tutgan a la «romantica auta», van dentant sur quellas ora cun integrar furmas barocas e classicas.
Johannes Brahms è naschì ils 7 da matg 1833, a Hamburg ha il giuven emprendì cun set onns da sunar clavazin e gia baud è samussà ses talent da cumponer. Cun 10 onns ha el survegnì instrucziun da cumponer. Sias emprimas cumposiziuns èn per clavazin. Pli tard ha el emprendì d'enconuscher Robert Schumann e sia dunna Clara. In amicizia che ha durà l'entira vita.
Brahms è stà in fritgaivel cumponist. Tranter auter ha el scrit quatter sinfonias, diversas autras ovras per orchester (per exempel ils «Sauts ungarais») sco era concerts per clavazin, musica da chombra cun e senza clavazin, ovras per orgla sco era numerusas chanzuns per chor e chant solo.
Ils ultims 20 onns da sia vita era Brahms ina persunalitad da renum en la scena da musica internaziunala ed era apprezià sco pianist, dirigent e cumponist. Cun be 63 onns è Brahms mort en consequenza da cancer. El è sepulì a Vienna, sin il santeri central.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.