Siglir tar il cuntegn

Header

audio
Fernande Decruck – Ina cumponista franzosa
Or da Artg musical dals 04.12.2022. Maletg: MAD
laschar ir. Durada: 58 minutas 58 Secundas.
cuntegn

Artg musical Fernande Decruck – ina cumponista franzosa

Da Nadal 1896 è naschida en il sidost da la Frantscha ina buoba cun in immens potenzial musical. Fernande Breilh ha gia en giuvens onns cumenzà a sunar clavazin, ha gudagnà premis ed è pli tard daventada in'organista e cumponista da renum mundial. L'Artg dat ina pitschna invista en sia vita.

Ils 25 da december 1896 è naschida a Gaillac, ina citad en il sidost da la Frantscha, Jeanne Delphine Fernande Breilh, figlia dal negoziant Ferdinand Breilh e da Rosalie Borrell. Gia cun otg onns entra Fernande en il conservatori da Toulouse nua ch'ella gudogna il 1911 il premi «Prix de Solfège», il 1913 il premi da clavazin ed il 1917 in segund premi per armonia. In onn pli tard po il giuven talent da musica ir al Conservatoire national supérieur de musique a Paris. Er là fa ella furora e gudogna ulteriurs premis. Il december 1922 cumenza ella a studegiar l'orgla. L'entschatta da sia carriera musicala lavura ella savens era sco improvisatura en ils kinos per ils films mits (films senza tun).

New York City

Ils 29 da schaner 1924 marida Fernande il clarinetist e contrabassist Maurice Decruck. Il 1925 nascha la figlia Jeanine ed il 1926 il figl Michel. Il medem onn daventa ella era professura d'orgla. La fin dal 1928 fa ella ina turnea da concerts d'orgla en ils Stadis Unids. Ella è daventada solo-organista dals gronds auditoriums a New York (era dal Wannamaker Auditorium). Fin l'onn 1933 ha Fernande Decruck vivì ensemen cun sia famiglia a New York City. Là ha ella er cumponì ovras per clavazin ed orgla, pli tard lura er ovras per saxofon.

fotografia nair ed alv, dunna suna orgla
Legenda: Ferndande Decruck vi da ses instrument preferì: l'orgla. MAD

Return a Paris

La carriera musicala da l'um Maurice è vegnida interrutta entras in accident. Entras quel ha el pers la movibladad en in da ses mauns e n'ha betg pli pudì sunar. El è turnà il 1932 a Paris ed ha fundà «Les Éditions de Paris», ina chasa editura spezialisada per musica da varieté e che ha era contribuì a la scuverta d'Edith Piaf. Il 1933 è era Fernande Decruck returnada en Frantscha ed ha scrit numerusas ovras per blers instruments a flad ed accumpagnament da clavazin. Il 1937 nascha il terz uffant, Alain. La naschientscha custa bunamain la vita a Fernande ch'aveva adina ina flaivla sanadad.

Ils ultims onns da sia vita ha la cumponista lavurà sco professura d'armonia ed istorgia da musica a Fontainebleu. Da ses um è ella sa separada il 1950. Durant quests onns ha ella scrit blera musica da film. Il 1952 ha ella gì in culp che ha chaschunà ina paralisa d'ina vart dal corp e che ha restrenschì ella corporalmain ferm. Ils 6 d'avust 1954 ha in segund culp lura chaschunà sia mort. Ses relasch musical cumpiglia radund 300 ovras.

RTR Artg musical 14:00

Artitgels legids il pli savens