Siglir tar il cuntegn

Header

audio
Arpa e ghitarra a 12 cordas
Or da Artg musical dals 27.11.2022.
laschar ir. Durada: 57 minutas 38 Secundas.
cuntegn

Artg musical Arpa e ghitarra à 12 cordas

Per l'emprima dumengia d'Advent porta l'Artg musical musica fina dad arpa e da ghitarra. Joel von Lerber, in giuven arpist svizzer suna l'arpa da pitschen ensi ed Anders Miolin, oriund da la Svezia, ha sviluppà il 2017 la «dodeka», ina ghitarra cun 12 cordas, il dubel d'ina ghitarra originala.

Sébastien Érard, in constructur d'instruments franzos, ha gronds merets che l'arpa moderna è sa sviluppada. Il 1810 ha el survegnì il patent per in'arpa cromatica cun pedal dubel. Cun set pedals ed ina mecanica bain ponderada eri per l'emprima giada pussaivel da variar la lunghezza da las cordas ed uschia han las arpistas ed ils arpists pudì sunar tuttas tonalitads senza stuair accordar da nov lur instrument.

Joel von Lerber

Grazia a quest svilup pon era arpistas ed arpists da noss temp sunar ovras magari adina pli cumplexas. In da quests arpists è Joel von Lerber. Il giuven musicist è naschì il 1991 a Basilea. Cun sis onns ha el survegnì l'emprima instrucziun sin l'arpa al conservatori a Berna. Il 2014 ha el fatg il Master of Arts ed il 2016 Master of Music. Il 2019 ha el terminà ses examen da concert «cun distincziun» al Konzerthaus Berlin, quai è il medem mument era stà ses debut cun il Konzerthausorchester Berlin.

Actualmain viva el a Berlin ed è in solist tschertgà.

Anders Miolin

30 onns pli vegl che Joel von Lerber è il ghitarrist Anders Miolin. El è naschì il 1961 a Stockholm ed ha gia en giuvens onns cumenzà a sunar la ghitarra. L'instrument ha fascinà Miolin ed avant paucs onns, il 2017 ha el schizunt gì l'idea da crear ina ghitarra cun 12 cordas, pia gist il dubel ch'ina ghitarra originala. Ermanno Chiavi ha construì questa ghitarra per Miolin ch'è il sulet musicist sin l'entir mund che suna la «dodeka». Ses repertori va da la renaschientscha fin a musica contemporana. El arranschescha e cumpona era musica per ses instruments e schlargia uschia il repertori e las pussaivlads da la ghitarra.

Actualmain è Miolin professer a la Scol'auta d'art a Turitg nua ch'el instruescha scolars internaziunals. Dasper sia lavur è el in musicist fitg activ e tschertgà.

RTR Artg musical 14:00

Artitgels legids il pli savens

Scrollar a sanestra Scrollar a dretga