Star da musica «Zega» - «Zega» ed Arbelina enina – ina dunna, duas vitas

Legenda: Arbelina Maralushaj, alias «Zega» sin visita en il studio da RTR. RTR, I. Orlik

Ils geniturs Maralushaj èn migrads dal Cosovo en Svizra ed èn sa chasads a Rabius. Ensemen cun ses frar e duas soras è Arbelina, la giuvna en famiglia, creschida si ed ida a scola a Rabius. Las ragischs tar sia segunda patria ha ella adina mantegnì entras ses geniturs e visitas.

audio

Arbelina Maralushaj, alias «Zega» sin visita tar RTR.

06:19 min, ord Actualitad dals 20.06.2019.

laschar ir. Durada: 6 minutas 19 Secundas.

Ils emprims pass

Chantar e far musica è adina stà la gronda passiun dad Arbelina. Quai ha ella cunzunt fatg en ses linguatg mamma e na betg per rumantsch, malgrà ch’il rumantsch è anc oz sia lingua principala en il mintgadi. Avant bun trais onns ha Arbelina lura cumenzà sut il num d’artista «Zega» a registrar sias emprimas chanzuns ed ha producì videoclips vitiers. Ils videoclips, logicamain producids e publitgads per il public en il Cosovo ed en Albania, han chattà in bun access tar il public. Gea, sia musica plascha là talmain bain ch’il dumber da clics sin ils videoclips è creschì enfin oz tar plirs milliuns!

Daventada in star

Sche Zega va oz per las vias en il Cosovo ed Albania vegn ella pledentada e survegn dumondas per far fotografias. Ella va sin turnea da promoziun tar staziuns da televisiun e radio. Mo tar nus? Tar nus n’enconuscha anc nagin «Zega». Qua è ella anc adina l’Arbelina che lavura sin biro e viva ina vita normala. Ina situaziun che plascha per il mument era anc ad ella.

audio

«Zega» cun la nova single «OMG»

06:54 min, ord Actualitad dals 20.06.2019.

laschar ir. Durada: 6 minutas 54 Secundas.

Nova single «OMG»

Uss vul Zega dentant empruvar da cuntanscher in public internaziunal. Sia nova chanzun «OMG», chanta ella per l’emprima giada er en autras linguas. E qua mussa ella gist tge ch’ella sa! La chanzun è per tudestg, franzos, englais ed in zic albanais, pia pli internaziunala. Uschia vul ella era cuntanscher in public ordaifer ils cunfins da sia segunda patria.

E rumantsch?

04:06

video

Arbelina e Zega

Or da Giuventetgna dals 21.06.2019.

laschar ir. Durada: 4 minutas 6 Secundas.

Per rumantsch n’ha «Zega» enfin oz betg chantà. Per il mument na saja quai era betg in tema, pertge actualmain saja il focus sin ses public en il Cosovo ed Albania, raquinta ella. Cun la clera finamira da reussir era tar in public internaziunal na tanschia betg dad anc chantar per rumantsch. Dentant, x-in di veglia ella era far ina chanzun per rumantsch, tradescha Arbelina.

audio

«Zega» na chanta per il mument anc betg rumantsch

03:31 min, ord Actualitad dals 20.06.2019.

laschar ir. Durada: 3 minutas 31 Secundas.

RR actualitad 11:00