Siglir tar il cuntegn

Header

video
Nagins bunas novas per occurenzas grondas
Or da Telesguard dals 29.04.2020.
laschar ir
cuntegn

Stad da festivals Open Air Lumnezia vegn spustà sin 2021

Igl è capità quai che blers han spetgà durant questa crisa: Il Cussegl federal ha annullà occurrenzas grondas cun var 1000 persunas. L’Open Air Lumnezia ch’era cun 18’000 visitadras e visitaders gia vendì ora dapi pliras emnas vegn perquai spustà sin 2021.

«Igl è ina spada a dus taglioms. D’ina vart avain nus segirezza giuridica, da l’autra vart essan nus stads vendids ora uschè baud sco anc mai e quella glieud na po ussa betg vegnir, quai fa mal», di Norbert Cavegn president dal comité d’organisaziun da l’Open Air Lumnezia. L’entira scena da festivals è stada sco sin spinas per emnas ed ha spetgà vess la decisiun dal Cussegl federal. Blers èn gia sa preparads mentalmain ed uss èsi vegnì uschia co i ha stuì vegnir. «L’Open Air Lumnezia vegn franc a subir donns finanzials, igl n’è dentant nagina smanatscha per l’existenza».

Qua trais impurtantas dumondas a Norbert Cavegn:

Cura ha l’Open Air Lumnezia 2021 lieu?

Ils 22 fin ils 24 da fanadur 2021.

Tge capita cun mes ticket ch’jau hai gia cumprà?

Quels restan valaivels per l’onn proxim e na vegnan betg restituids. L’Open Air infurmescha en il decurs dals proxims dis sin lur homepage.

Tge capita cun il Line Up?

Nus essan vid discutar cun las bands e vulessan gugent che tuts vegnian era l’autra stad. Quai munta medem line up sco il 2020 simplamain il 2021.

Quest onn fiss Norbert Cavegn per la 36avla giada a l’Open Air, ma tge fa el lura ussa cun sia stad libra?

Quai è l’emprima stad senza Open Air durant quai temp e quai vegn a vegnir fitg curius. Na betg ma per mai, mabain per l’entir comité. Jau n’hai anc betg ponderà tge far enstagl la stad.
Autur: Norbert Cavegnpresident dal comité d'organisaziun

Plievgia, naiv, chaliras ma anc nagin coronavirus

L’Open Air Lumnezia ha gia fatg atras bler. Davent da chaliras grondas fin navaglias a mez la stad. Ed adina puspè plievgia uschia ch’ils stivals da gumma èn daventà equipament da basa per il festival. Buc d’emblidar il chametg il 2016 che ha mess ord funcziun il provediment electric da la Lumnezia e stizzà per pliras uras tuttas chazzolas sin e sper tribuna. Il redactur da musica Jachen Prevost ha lavurà blers onns per RTR durant l’Open Air Lumnezia ed entras quai vis blers muments spezials.

RTR actualitad 17:00

Artitgels legids il pli savens

Scrollar a sanestra Scrollar a dretga