Siglir tar il cuntegn

Header

video
Premi svizzer per «Ils Fränzlis da Tschlin»
Or da Telesguard dals 07.05.2019.
laschar ir. Durada: 3 minutas 38 Secundas.
cuntegn

Actualitad musica Premi svizzer da musica per «Ils Fränzlis da Tschlin»

Gronda onur per Ils Fränzlis da Tschlin, els vegnan undrads cun il premi svizzer da musica. Ensemen cun 13 ulteriurs premiads pon els prender encunter il settember quest impurtant premi da l'Uffizi federal da cultura. Il premi principial «Grand Prix Musik 2019» va al duo «Cod.Act» da Le Locle.

Mintg'onn onurescha l'Uffizi federal da cultura 14 persunalitads u furmaziuns da musica cun il premi svizzer da musica. Ils premis, dotads cun 25'000 francs, han l'intent d'undrar e renconuscher las prestaziuns musicalas extraordinarias ed innovativas.

Gronda surpraisa e plaschair

La novitad ch'els vegnian premiads cun in tal premi, ha fatg surstar ed ha commuventà Ils Fränzlis, uschia Domenic Janett. Els n'hajan betg fatg quint cun ina tala undrientscha ed hajan uschia tant pli plaschair da quella renconuschientscha federala.

37 onns ed en la terza generaziun

Cun strusch quaranta onns è la furmaziun anc relativ giuvna. E tuttina è gia la terza generaziun dals Janetts activa. Domenic, Anna Staschia, Cristina, Madlaina e Curdin Janett vid clarinetta, violina, cello, viola da bratsch e cuntrabass – quai èn ils tschintg musicists dals Fränzlis da Tschlin dad oz.

audio
Ils Fränzlis da Tschlin – 25 onns «in viadi»
ord Artg musical dals 21.01.2007.
laschar ir. Durada: 57 minutas 44 Secundas.

Tschintgavla surdada dal premi svizzer da musica

Dapi il 2014 surdat l'Uffizi federal da cultura in premi per la scena da musica svizra. Cun il «Grand prix Musik» ed ils 14 premis da musica vulan ins undrar interprets e furmaziuns sur tut las spartas da musica. En il focus per la surdada 2019 è stada la musica electronica, interpretada e cumponida en differentas furmas.

«Grand Prix Musik» per duo Cod.Act

Il premi principal, dotà cun 100'000 francs va quest onn als dus frars André e Michael Décosterd da Le Locle. Sco duo Cod.Act sa movan els en il sectur d'art da tun. Els creeschan producziuns da musica en moda electronic-acustica en cumbinaziun cun projecziuns da figuras e furmas digitalas. Els preschentan lur art a festivals sin l'entir mund ed han gia pudì retschaiver numerus premis per lur lavur.

Ils ulteriurs premis svizzers da musica van a Bonaventure – Soraya Lutangu, D’incise – Laurent Peter, Pierre Favre, Béatrice Graf, Michael Jarrell, Kammerorchester Basel, KT Gorique, Les Reines Prochaines, Rudolf Lutz, Björn Meyer, Andy Scherrer, Sebb Bash e Marco Zappa.

RR actualitad 11:00

Artitgels legids il pli savens