Il bab è stà electroinschigner, la mamma musicista – duas chaussas che han senza dubi influenzà il giuven Peter Gabriel. Dal bab ha el ertà l’interess vid l’electronica e la mamma ha gia baud mussà ad el da sunar la clarinetta. Forsa era pervia da quai ha l’Englais ch’è naschì 1950 a Chobham tschernì la via sco musicist. Ina via che ha per propi cumenzà cun 17 onns cura ch’el ha fundà la band Genesis ensemen cun Tony Banks, Mike Rutherford, Christ Steward ed Anthony Phillips. Els èn stads pioniers da la musica da rock progressiv ed han fatg chanzuns cun melodias cumplexas e divers instruments. Chanzuns che han per part cuzzà var quart d’ura sco per exempel «Supper’s Ready» dal 1972 che cuzza bun 23 minutas.
La carriera da solo
Gia otg onns pli tard ha la band gì grond success, era internaziunal, ed han schizunt savì far ina turnea mundiala. A la fin da quella ha Peter Gabriel bandunà la gruppa. Ils motivs èn stads la greva naschientscha da sia figlia e discordia entaifer la band pertutgant il stil da lur musica. Durant che la band è glischnada pli e pli fitg en il mainstream ha Gabriel vulì suandar la via dal rock progressiv ed experimentar enavant cun differents geners.
Ses success
Ses emprim success sco artist da solo ha Gabriel lura gì 1977 cun «Solsbury Hill». Cun quella chanzun ha Gabriel tranter auter elavurà la separaziun da Genesis. Enfin 1986 ha el publitgà tschintg albums (Perquai ch’el n’ha betg vulì dar in titel a ses emprims quatter albums èn quels vegnids battegiads inuffizialmain «Car», «Scratch», «Melt» e «Security»). L’album «So» ha dentant surpassà tut tschels albums. Tranter auter chattan ins sin quest album ses grond hit «Sledgehammer» che ha tenor l’artist be gì tant success pervia dal video innovativ. Quel è fin oz il video emess il pli savens insumma tar MTV ed ha gudagnà 9 MTV Music Awards tge ch’è medemamain record.
Engaschament umanitar ed auters projects
Musicalmain è Peter Gabriel fin oz activ. Tranter auter ha el accumpagnà l’onn 2000 la Millenium Show a Londra e 2006 ha el mess ensemen la musica per il campiunadi mundial da ballape. Gia pli baud ha el fundà ses agen label «Real World Records». L’emprima publicaziun da quest label è stà la musica «Passion» per il film «Die letzte Versuchung Christi». Tenor critichers saja quai stà il punct culminant da Gabriel tge che pertutga la musica mundiala. Sper la musica è il chantadur s’engaschà per ils dretgs umans cun sustegnair «Amnesty International», cun si’atgna organisaziun «Witness» e cun concerts da beneficenza. Simbolicamain per quest engaschi stat la chanzun «Biko» dal 1979. In chanzun da protest encunter l’apartheid.
RTR actualitad 09:00