Siglir tar il cuntegn

Header

cuntegn

Marie Fredriksson La chantadura da Roxette è morta

La gruppa svedaisa cun il pli grond success suenter ABBA ha pers sia chantadura – il glindesdi, ils 9 da december, è Marie Fredriksson morta. Durant 17 onns ha ella cumbattì cunter in tumor dal tscharvè.

Marie Fredriksson è naschida ils 30 da matg 1958 en il sid da la Svezia. Gia durant ses studi da musica è ella stada part da la gruppa «Mamas Barn». Grond success ha ella dentant pir gì cun la gruppa «Roxette» ch'ella ha fundà 1986 ensemen cun Per Gessle. Durant ils onns 80 ed 90 èn els daventads ina da las pli impurtantas gruppas da pop e Marie Fredriksson ina da las pli enconuschentas vuschs da quella generaziun.

Emprim hit – in megahit

«The Look» da lur segund album «Look Sharp!» è per schabetg arrivà en ils Stadis Unids ed ha là gì grond success en ils radios da students. A partir da là ha la chanzun cuntanschì ils emprims plazs en las paradas da hits da blers pajais.

audio
Ils emprims pass da la band Roxette
ord Semperverds dals 10.12.2019.
laschar ir. Durada: 3 minutas 19 Secundas.

Ulteriurs hits da la gruppa che restan a blers en l'ureglia èn tranter auter «Listen to Your Heart», «It Must Have Been Love» u era «Joyride». En lur carriera han «Roxette» vendì var 75 milliuns portatuns, èn stads quatter giadas sin plaz 1 en l'America en la parada da Billboard ed han gì 19 chanzuns en ils top 40 da la Gronda Britannia. Cun quai èn els la gruppa svedaisa cun il pli grond success suenter ABBA ed han influenzà profundamain la musica da lur temp.

audio
Roxette: Gronds success durant ils onns 1990
ord Semperverds dals 10.12.2019.
laschar ir. Durada: 2 minutas 52 Secundas.

RTR semperverds 16:00

Artitgels legids il pli savens