El ha cumponì blers semperverds ch’èn restads en l’ureglia: Green River, Who'll Stop The Rain, Proud Mary e Bad Moon Rising, tuns da las palids dal sid dals Stadis Unids, dad ina band californiana.
John Fogerty, è naschì ils 28 da matg dal 1945 a Berkeley in California, e cun ses frar Tom, cun Stu Cook e Doug Clifford ha el funda il 1967 la band «Creedence Clearwater Revival» che è daventada ina da las impurtantas da quels onns.
CCR – 5 onns, 7 discs e dapli success sco ils Beatles
L’istorgia da «Creedence Clearwater Revival» è stada da curta durada, be 5 onns pli tard va tut a fin. Però en quel temp han els fatg 7 discs remartgabels ed han vendì sur 100 milliuns discs. In dals facturs impurtants dal success: sia vusch gruglia e marcanta, ses stil da sunar la ghitarra e las atgnas cumposiziuns che vegnivan finadina da John Fogerty.
Il grond embrugl e las dispitas
Malgrà il success: en la band datti cuntraversas pervi da dumondas artisticas e pervi dals raps e suenter anc ina dispita da John Fogerty cun il producent Saul Zaentz. Quel aveva fatg in contract cun Fogerty, cun nauschas consequenzas per l’autur dals hits da CCR. Tut ils dretgs e las entradas èn idas a Zaentz – il cumponist è vegnì embruglia per milliuns. Fogerty ha lura pers ils gust da far musica, e per divers onns è el sa retratg. Pir il 1985 datti in return cun il disc «Centerfield», ina segunda primavaira per in dals gronds da la musica da rock americana.
Ils 7 discs da «Creedence Clearwater Revival»:
Creedence Clearwater Revival (1968)
Bayou Country (1969)
Green River (1969)
Willy and the Poor Boys (1969)
Cosmo's Factory (1970)
Pendulum (1970)
Mardi Gras (1972)
Ed in pèr da lur semperverds:
Green River - Down On The Corner -Who'll Stop the Rain
Long as I Can See the Light - Run Through the Jungle
Have You Ever Seen the Rain -Fortunate Son
Bad Moon Rising -Proud Mary -Suzie Q