Tschintg onns èn passads dapi che Stress ha publitgà ses ultim album. Tschintg grevs onns per il rapper da Losanna. El ha cumbattì – e cumbatta anc adina cun depressiuns. El saja sa sentì vid ed haja stuì reparar bler en sia vita. Perquai ha el tschertgà agid professiunal.
Stress n'ha betg zuppà ses problems ed era partì online ina sesida cun sia terapeuta. Quai per far curaschi ad auters dad ir per agid cura ch'ins dovra. Il medem messadi ch'el vul era dar cun insaquantas chanzuns da ses nov album «Sincèrement». Sco Stress di sez, èsi in da ses megliers albums dals ultims 10 fin 15 onns.
«God Knows – Dieus sa»
Ils ultims onns ha Stress pudì observar co amias ed amis han survegnì uffants e co quai ha dà forza e fatg bain ad els. Da quai raquinta el en l'emprima single «God Knows» da ses nov album. Andres Andrekson – sco Stress ha num per propi – n'ha sez nagins uffants, vesa dentant sia band e ses musicists sco pitschna famiglia che dat sustegn e forza ad el.
Ensemen cun noss moderatur Ivo Orlik ha Stress lu prendì per mauns la sfida ed emprendì e registrà entaifer bun ina mes'ura ina versiun rumantscha da «God Knows».
RR actualitad 11:00