RTR ed ils ulteriurs emetturs da radio da la SRG SSR mettan gronda paisa sin la musica d’artistas ed artists svizzers. Era perquai emettain nus quest venderdi ils 18 da settember l’entir di 100% musica svizra. Sper in entir di musica da la Svizra vegni era a dar quatter istorgias da la scena da musica.
- Curdin Nicolay discurra davart il tema carriera musicala e famiglia.
- Renata Geronimi è dapi 24 onns presidenta dal chor maschadà Alvra. Da far quai uschè ditg n’è dentant mai stà ses plan.
- A Degen avain nus s’inscuntrà cun Philip Laffer. El è in producent da musica oriundamain da Basilea. Cun el avain nus discurrì davart la scena da musica svizra.
- E lura raquinta Marcus Petendi da sias experientschas cun sia band Polyphone e daco ch’el è ussa pli gugent solo sin via.
Ina chanzun aposta per il di da la musica svizra
Durant il di da la musica svizra datti ina pitschna premiera mundiala: «Ensemen cun vus» dals «RTR Allstars». Ina chanzun fatga aposta per quest di spezial.
In festival svizzer
La musica svizra na vegn dentant betg be celebrada en ils radios da la SSR. La fin d’emna dals 18 fin ils 20 da settember è il Label Suisse a Losanna. Trais dis pon ins là giudair musica da furmaziuns svizras da tut ils geners.
Cun gruppas etablidas sco per exempel «Oesch’s die Dritten» ubain «La Triada» da la rumantschia. Dentant san ins era scuvrir ina massa furmaziuns novas sco «The Animen» ni «Chien Bleu». Tranter ils 21 ed ils 25 da settember emettain nus registraziuns da concerts dal Label Suisse. Mintga saira tranter las 20:00 e las 21:00.
- 21-09: The Animen (Rock)
- 22-09: Buvette (Indie)
- 23-09: Oesch’s die Dritten (Musica Populara)
- 24-09: Crimer (Synthie Pop)
- 25-09: La Triada (folclora)
