Siglir tar il cuntegn

Header

Navigaziun

L'ensemble acavoce sin tribuna.
Legenda: Suenter 20 onns da success, dat l'ensemble acavoce proxim december ses ultim concert. RTR, Esther Berther
cuntegn

Musica Acavoce prenda cumià dal public

L’ensemble da chant Acavoce dat la fin da quest onn ses ultim concert. Quai ha l’ensemble a-capella communitgà.

Perquai che betg pli tut ils chantadurs e las chantaduras possian s'engaschar cun persvasiun per la gruppa, ha acavoce annunzià ch'els vegnian a dar il december da quest onn lur ultim concert. Las chantaduras Gaby Degonda ed Agnes Niedermann ensemen cun ils chantadurs André Niedermann, Flavian Gieriet, Adriano Kollegger e Markus Kressig pon mirar enavos sin 20 onns da success sin tribuna.

Il commember Flavian Gieriet ha ditg envers RTR: «Sch'il hobi daventa adina dapli e dapli tar la lavur, sche ston ins sa decider e metter prioritads.» La conclusiun è stada, da schliar il sextet vocal. Tscherts commembers hajan decidì da dar dapli paisa a la vita privata. La gruppa na vegn betg ad exister vinavant, era betg cun novs commembers.

Concert da giubileum è ultim concert

Acavoce ha dà pli che 400 concerts durant sia carriera e publitgà tschintg albums tranter il 2004 ed il 2017. Ultra da quai ha l'ensemble organisà festivals da musica dad a-capella sco era pudì sa preschentar al radio ed a la televisiun tar emetturs regiunals e naziunals.

Quest onn po acavoce festivar ses giubileum da 20 onns. Cun ils concerts da giubileum prenda il sextet vocal pia gist cumià dal public.

RR novitads 06:00