Suenter l’Open Air Lumnezia – in dals pli gronds festivals dal Grischun spetga in dals pli vegls: l’Open Air Chapella. Quest onn ha quel lieu per la 40avla giada. Qua pon ins giudair ils concerts sin in cleragl en il guaud, sch’ins vul era direct da la tenda. Il festival engiadinais è l’open air per famiglias cun gieus per uffants e tgira d’uffants. Tradiziunalmain na vegn era betg vendì alcohol sin l’areal – il focus è sin star da cumpagnia e giudair la musica ed ils concerts.
Ils concerts
Durant il giubileum da l’Open Air Chapella sa preschentan puspè musicistas e musicists rumantschs, grischunas e da l’entira Svizra.
Venderdi cumenza la giuvna chantadura grischuna «Julie Fox». Silsuenter suonda la band «Oak Street» cun Gianni Tschenett ch'han publitgà il 48avel Top Pop Rumantsch «Tschêl blov». In dals highlights da la fin d’emna spetga sonda vers saira cun l’enconuschent chantautur svizzer «James Gruntz». Dumengia datti sper il brunch tradiziunal era anc trais ulteriurs concerts.
Ord l'archiv
Uschia tunavi a l'Open Air Chapella dal 1988.