Siglir tar il cuntegn

Header

audio
«Cumprau!» – il microfon na di betg manzegnas
Or da Marella dals 03.11.2019.
laschar ir. Durada: 45:38 minutas.
cuntegn

35 onns producziun da musica «Cumprau!» – il microfon na di betg manzegnas

Passa 11'000 titels ha RTR registrà en tut quels onns. Quai èn era fitg bleras regurdientschas. Da quellas udin nus en la Marella.

Producziuns da chant e musica da RTR fineschan fitg savens cun il pled magic «cumprau». Chantadurs e dirigents raquintan en questa marella, quantas giadas ch'els han spetgà vess sin quest pled e cun tge regurdientschas ch'els collian lur chanzuns.

in um che lavura cun in bindel da tun.
Legenda: Giusep Giuanin Decurtins. Il temp da lavurar cun il bindel tutga al passà. RTR

Las producziuns da musica en atgna reschia han cumenzà il 1984. La persuna ch'ha inizià e manà vinavant quellas enfin oz è Giusep Giuanin Decurtins. El finiva las registraziuns cun la remartga «cumprau».

Sias experientschas èn nundumbraivlas ed el enconuscha quasi mintgin e mintgina en l'entira scena musicala dal Grischun. Remartgabel èn ils nums ch'el ha. Davent da Giusep, Giusep Giuanin enfin a GGD datti bleras versiuns – perfin: «Giusep cumprau». El è daventà en il vair senn dal pled il maestro da la registraziun.

Mario Pacchioli sa regorda fitg bain da sia emprima registraziun cun RTR. Quella è stada sco buob a Laax. Igl era ina saira cun gronda navada ed el saja stà fitg impressiunà da tut questa tecnica.

Clau Scherrer ha fatg sias emprimas registraziuns cun RTR gia cura ch'el era in buobet e sunava clavazin. Oz è la musica sia professiun ed en il decurs dals decennis èn registraziuns vegnidas fatgas – l'ulitima cun ses chor Cantus Firmus.

in buob vida sunar clavazin.
Legenda: Clau Scherrer sco buobet durant ina registraziun. Ensemen cun sias quatter soras ha el fatg bleras registraziuns. RTR

Era Judit Scherrer ha gia fatg registraziuns sco buoba ensemen cun sias soras ed il frar Clau. Sch'ella audia oz per casualitad ina da questas registraziuns saja ella surstada, la qualitad saja buna. Da la famiglia Scherrer datti bleras registraziuns en las pli differentas furmaziuns.

RR Marella 09:00