Siglir tar il cuntegn

Header

audio
Per exempel Sagogn
Or da Marella dals 30.12.2019.
laschar ir. Durada: 37:44 minutas.
cuntegn

Marella Per exempel Sagogn

Co sa mida ina vischnanca durant ils onns? E constat quai, ch'il spiert da cuminanza en ils vitgs va a perder, sco ins auda adina puspè? La Marella ha fatg ina visita a Sagogn ed entupà là il president communal, ils dus plevons ed in schurnalist.

Savens capiti a moda subtila, quai che sa mida en in vitg grischun sco per exempel Sagogn: Halloween daventa adina pli popular, ir a chantar Bumaun vulan percunter adina pli paucs uffants; en la correspundenza communala svanescha la vopna, remplazzada dad in logo; ed entant ch'il chor viril sto chalar pervia da mancanza da commembers, cultiveschan auters vischins puspè ils vegls curtins da pumera.

Betg adina èsi mo schlet, quai che sa mida en in vitg en in temp d'individualissem e pluralissem. Tge vul quai insumma dir, «bun» e «schlet»? Structuras veglias crodan, persuenter vegnan revitalisadas tradiziuns prest emblidadas. E la birocrazia crescha, segir, però n'è quai betg er ina consequenza che la glieud vul sa participar a process politics?

En il futur duai la vischnanca survegnir in nov access al stradun chantunal (sura a sanestra) – la planisaziun da la nova via è dapi blers onns in politicum.
Legenda: En il futur duai la vischnanca survegnir in nov access al stradun chantunal (sura a sanestra) – la planisaziun da la nova via è in politicum dapi 13 onns. Google Maps

La Marella intercurescha questas dumondas a l’exempel da Sagogn en Surselva, ina vischnanca cun 700 abitants tipica per il Grischun: Il vitg è situà al cunfin linguistic tranter rumantsch e tudestg, el profitescha dal turissem, Cuira è per blers pendularis en buna distanza, il dumber d’abitants è stabil, ed i dat anc bleras uniuns.

Per questa emissiun avain nus discurrì cun intgins portavuschs da Sagogn, ins pudess era dir: represchentants da las tipicas instituziuns en in vitg – cun Augustin Beeli, in schurnalist engaschà en la cultura locala, cun Hans Peter Casutt, il president communal, e cun ils dus plevons Daniel Hanselmann ed Alfred Cavelti. Els laschan savair cun tge sentiments ch’els persequiteschan las midadas da lur vitg. Lur valitaziuns varieschan per part fitg – tranter displaschair ed optimissem, tranter encreschadetgna e critica.

RTR Marella 09:00

Artitgels legids il pli savens

Scrollar a sanestra Scrollar a dretga