Las vacanzas èn avant porta ed uschia era bleras persunas che van a la tschertga da lieus cun aua, lais, lieus solitaris per pudair giudair il temp liber. Fitg blers cumpartan era quests lieus en las raits socialas. L'effect da quests posts è dad ina vart fitg bun per il turissem, da l'autra vart pon els era daventar ina vaira sfida sche adina pli bleras persunas vulan medemamain vegnir en quests lieus magics.
In da quests exempels è il Lag la Cauma. In vair hotspot en il Grischun. Dapi intgins onns è il dumber da visitaders s'augmentà durant la stagiun auta uschè ferm che las entradas han stuì vegnir limitadas sin 1'700 persunas per di. Guido Casty, il president da la cumissiun dal Lag la Cauma di, che l'effect da social media saja dad ina vart fitg bun, ins na dovria betg pli daners per pudair far reclama, da l'autra vart n'hajan ins insumma nagina controlla pli.
Era Martin Vincenz da Grischun Vacanzas conferma ch'il Grischun ha survegnì uschia ils davos onns plirs hotspots e quels hajan quasi tuts da far cun l'aua. D'ina vart bun per il turissem, ils lieus stoppian dentant esser preparads e pudair reglar traffic ed infrastructura. Quai saja fitg impurtant.
Ina campagna dal Club alpin svizzer va ussa, curt avant las vacanzas exact en quella direcziun. Cumparter saja bun, dentant betg tut e betg adina, din els.
En questa Marella giain nus sin ils fastizs da la fascinaziun da l'aua, da hotsposts e las sfidas per quests lieus.