Tranter la fin dal 19avel tschientaner ed il 1952 han passa 85’000 dunnas perdì lur naziunalitad svizra, quai perquai ch’ellas han maridà in um d’in auter origin. En sia dissertaziun intercurescha l’istoricra Silke Margherita Redolfi ils origins e las consequenzas da questa pratica.
Questa lescha matrimoniala era bain derasada en l’entira Europa, ma n’è pervia da quai betg main scandalusa. Perquai che questas dunnas eran suttamessas al dretg dad esters, n’avevan ellas dad in di sin l’auter betg pli il dretg sin agid social, vegnivan tractadas sco estras en l'agen pajais e stuevan dumandar il dretg da dimora e da lavur.
Ils destins ils pli tragics èn quels da dunnas che vivevan en precariat e quels da dunnas en territoris da guerra.
In’ulteriura spada da Damocles che pendeva sur questas anteriuras Svizras e lur famiglias era il ristg da l’expulsiun: sch’insatgi da la famiglia commetteva in delict u sch’ella era uschè paupra ch’ella avess duvrà sustegn da la vischnanca da dimora, lura pudevi tgunsch esser che l'entira famiglia vegniva expulsada en il pajais d’origin da l’um.
Ils cas extrems en connex cun questa lescha èn succedids durant la segunda guerra mundiala, cura che anteriuras Svizras n’han betg pli pudì turnar en lur patria d'antruras. Tragicamain han ils destins da questas dunnas contribuì considerablamain a midar las mentalitads, uschia che la perdita absoluta da la naziunalitad en cas dad ina lètg maschadada è vegnida abolida il 1952.
RR Marella 09:00