Siglir tar il cuntegn

Header

Selina Chönz ed Alois Carigiet
Legenda: Ils "geniturs" dad Uorsin: Selina Chönz ed Alois Carigiet. Keystone
cuntegn

75 onns Uorsin In'istorgia da success mundial

L’istorgia dal mat cun chavels ritschads nairs, egls blaus e la chapitscha da launa blaua datti entant en 15 differentas linguas, perfin en la scrittira da tschorvs.

Il cudesch d’uffants rumantsch è stà in tal success e quai betg be tar nus, ma en tut il mund – quai è bunamain in miracul
Autur: Chasper Pultcuratur exposiziun Uorsin

Il cudesch «Uorsin» che l’Engiadinaisa Selina Chönz-Meyer ha scrit, ha il Sursilvan Alois Carigiet illustrà cun ses maletgs ed uschia er contribuì sia part impurtanta vid l’istorgia da success.

Exposiziun anc averta

En la Chesa Planta a Samedan datti anc fin ils 9 d’october 2020 in’exposiziun davart ils dus artists e lur istorgia da success: Selina ed Alois – 75 onns Uorsin. Chasper Pult ha ramassà per quella exposiziun ina pluna fastizs da Chönz e Carigiet.

L'autura....

Selina Chönz, naschida il 1910 a Samedan aveva emprendì mussadra da scolina, era viagiada ed aveva emprendì pliras linguas. Suenter sia emprima plazza a Zuoz, ha ella vivì cun ses um Jachen Ulrich Könz e ses quatter uffants a Guarda. In da quels mats è l’artist e pictur Constant Könz da Zuoz. La relaziun tranter el e sia madrastra Selina na saja betg adina stada armonica. Quai surtut cura ch’els han discutà davart l’art e sia impurtanza.

Selina era ina persuna nova tar nus en chasa e quai ha funcziunà tant enavant en urden.
Autur: Constant KönzFigliaster da Selina Chönz

La ferventa Rumantscha ed er engaschada per ils dretgs da las dunnas, aveva remplazzà il «K» da ses num da schlatta tras in «CH».

L'illustratur...

Alois Carigiet, naschì il 1902 a Trun, ha lavurà suenter in emprendissadi sco pictur da decor a Turitg, nua ch’el aveva in agen atelier cun fin a 6 emploiads. Il placat il pli enconuschent durant quella perioda è quel ch’il artist aveva creà per la «Landi» dal 1939. Carigiet è silsuenter sa retratg da l’affar a Turitg ed è ì a la tschertga da sia via artistica.

Inscunter arranschà

La sentupada tranter Selina Chönz ed Alois Carigiet è be gartegiada grazia l’engaschi dal «puclarin» Jon Pult. Il romanist aveva gidà a Chönz da contactar l’artist a Turitg. Fin ch’il cudesch «Uorsin» è stà pront, haja durà 5 onns. Er anc oz è l’istorgia dal mat engiadinais che na capitulescha betg in hit. Ed «Uorsin» tutga suenter «Heidi» tar il pli enconuschent cudesch d’uffants.

Il grond success dal cudesch han ils «geniturs da l’Uorsin» Chönz e Carigiet, anc pudì giudair ditg. Alois Carigiet è mort il 1985 cun 83 onns, Selina Chönz il 2000 en la vegliadetgna da 90 onns.

RTR Marella 09:00

Artitgels legids il pli savens

Scrollar a sanestra Scrollar a dretga