Siglir tar il cuntegn

Header

Brad Mehldau
Legenda: Brad Mehldau MAD
cuntegn

Festival da jazz San Murezzan Brad Mehldau e Richard Galliano sin il palc

Dus concerts da dus musicists da renum. Brad Mehldau ha sunà solo sin il piano, e Richard Galliano è sa preschentà cun l'accordeon.

L’Artg da questa dumengia è deditgà al Festival da jazz a San Murezzan, e nus preschentain dus concerts che nus avain registrà ensemen cun SRF2 cultura. In la stad passada e l’auter al festival 2020.

Brad Mehldau, in pianist da renum mundial

Brad Mehldau, annada 1970, è oriund da Jacksonville, Florida. Gia cun sis onns ha el cumenzà a sunar, el ha fatg studis da clavazin e cumposiziun e cun 24 era el commember da la band dal saxofonist Joshua Redman. Pauc pli tard ha el fundà ses agen trio ed ha registrà sur 40 discs. El ha er accumpagnà blers auters musicists da renum sco Wayne Shorter, Charles Lloyd, Lee Konitz u Chris Potter.

Ils 8 da fanadur è el stà sin il palc dal festival da jazz ed ha procurà per l’avertura cun in concert solo. El ha preschentà atgnas cumposiziuns, classichers dal jazz american ed er tocs da John Lennon e Paul McCartney.

audio
Brad Mehldau sin il palc dal Festival da jazz a San Murezzan
53:26 min, Artg musical dals 26.09.2021.
laschar ir. Durada: 53:26 minutas.

Richard Galliano, il campiun a l'accordeon

Il segund concert dal Festival da jazz a San Murezzan che nus preschentain è quel da Richard Galliano e ses New Musette Quartet. Galliano, annada 1950, è oriund da la regiun da Cannes en la Frantscha dal Sid ed el è in grond virtuos a l'orgelet da maun ed al bandoneon.

Richard Galliano
Legenda: Richard Galliano Keystone

Il 1983 ha el dastgà sunar cun Astor Piazzolla, e quel ha animà el d’integrar pli  ferm la tradiziun franzosa en sia musica – e Galliano ha propi stgaffì in stil innovativ, l’uschenumnada «Musette Neuve». Ils ultims decennis è el daventà in dals accordeonists da jazz ils pli renumnads – ed ha er sunà cun bleras persunalitads da differents geners da musica: cun Juliette Gréco, Charles Aznavour, Chet Baker, Enrico Rava, Jan Garbarek, Michel Petrucciani, Toots Thielemans e Wynton Marsalis.

El è stà ils 23 da fanadur da l‘onn passà sin il palc da Festival da jazz a San Murezzan, accumpagnà da Jean-Marie Ecay a la ghitarra, Bruno Rousselet al bass e Jean-Christophe Galliano a la battaria. Els han sunà diversas cumposiziuns da Galliano ed er classichers dal jazz american. 

audio
Richard Galliano, il campiun a l'accordeon
54:20 min, Artg musical dals 26.09.2021.
laschar ir. Durada: 54:20 minutas.

RTR Artg musical 14:00

Artitgels legids il pli savens

Scrollar a sanestra Scrollar a dretga