Siglir tar il cuntegn

Header

audio
Co Marius Bear è vegnì da la via sin tribuna da l'ESC
Or da Actualitad dals 08.03.2022.
abspielen. Laufzeit 3 minutas 9 Sekunden.
cuntegn

Eurovision Song Contest Marius Bear – Da la via sin tribuna gronda

L'Appenzellais giuven ch’è cun 21 onns sa decidì da far musica, suna sis onns pli tard sin la gronda tribuna da l’Europa a l’ESC 2022 a Turin – in’istorgia sco d’in cudesch illustrà.

Cumenzà ha l’istorgia suenter ses emprendissadi sco mecanist da maschinas da construcziun. Ses plan era da lavurar suenter la recruta vinavant sin quest mastergn. Ina saira durant la recruta ha dentant midà tut. In camarat è intgantà da la vusch da l’Appenzellais e dumonda sch’el veglia far ina Jam Session cun el. Anc la medema saira ha quella lieu – per Marius Bear in’emprima giada. Dentant, sco el di oz, saja suenter quella saira stà cler per el che far musica saja quai ch’el veglia far en il futur.

Jau hai immediat sentì quant deliberant ch'igl è da savair exprimer mes sentiments tras il chant e la musica. Quai è stà l’emprim pass sin mia nova via.
Autur: Marius Bear chantautur

Il musicist da via sin tribuna gronda

Suenter la recruta ha Marius Bear prendì sia ghitarra ed ha cumenzà a far musica sin las vias da la Svizra e Germania. Tar in festival ha in reschissur envidà el a New York nua ch’el è spert daventà part da la scena svizra d’art e cultura. Ditg hai dentant betg tegnì el en l’America. Gia il 2017 ha el cumenzà in studi da producziun da musica en il renumà BIMM Institute a Londra. Suenter quels viadis ha el il 2019 publitgà ses emprim album «Not Loud Enough» e gudagnà in Swiss Music Award sco «Best Talent».

L’umeneri che mussa sentiments

En l’emissiun da televisiun tudestga «I Can See Your Voice» il 2020 è Marius Bear lura definitivamain s’etablì en il mund musical. Cun ses cover dal hit da Whitney Houston «I Wanna Dance With Somebody» ha el persvas il public e la giuria e cuntanschì en Svizra la Top 10 da la parada da hits. Quella vusch plain sentiment n'ha nagin spetgà da l'Appenzellais genuin.

Cun sia chanzun per l’ESC 2022 «Boys Do Cry» vul el dar curaschi a ses public da mussar lur sentiments ed esser uschia sco ch'els èn. I na saja nagina flaivlezza da mussar sentiments e sa mussar vulnerabel, mabain anzi ina gronda fermezza. La chanzun sezza è ina ballada reducida, accumpagnada da clavazin ed instruments ad artg.

Suenter il grond success da Luca Hänni il 2019 (plaz 4) e Gjon’s Tears il 2021 (plaz 3) èn las aspectativas grondas. Sche Marius Bear po ademplir quellas sa mussa il pli tard tar il final ils 14 da matg a Turin.

RTR actualitad 17:00

Artitgels legids il pli savens

Scrollar a sanestra Scrollar a dretga