Siglir tar il cuntegn

Header

video
Dachasa en privel – violenza en las atgnas quatter paraids
Or da Cuntrasts dals 22.11.2020.
laschar ir
cuntegn

Dachasa en privel Violenza en las atgnas quatter paraids

La statistica criminala dal Grischun mussa: Duas persunas èn vegnidas mazzadas l'onn 2019 en Grischun – e tuts dus mazzaments èn capitads en las atgnas quatter paraids. Tut en tut ha registrà la polizia grischuna 196 cas da violenza a chasa. E quai èn be ils cas che vegnan enfin tar la polizia. Ina part considerabla, uschia calculeschan expertas ed experts, resta en il stgir.

Tabla cun si ils nummers d'agid - chasa da dunnas 081 252 38 02, agid per victimas 081 257 31 50, hotline per persunas violentas 079 544 38 63.
Legenda: Il numer da la polizia è 117 – ed er tar questas instanzas datti sustegn per persunas pertutgadas da violenza a chasa. RTR

«Igl è da prender il tabu da la tematica»

«Igl è in tema enorm impurtant», di «Selina» en il film dals «Cuntrasts» da RTR. Perquai veglia ella er raquintar sia istorgia, «igl è da prender il tabu da la tematica». «Selina» n'è betg il vair num da la dunna – sia istorgia è dentant vaira. «Selina» ha oz passa 45 onns. Ella ha inscuntrà la violenza gia da poppa. Fin tar sia adolescenza è ella vegnida malduvrada e pitgada da ses bab.

«Marie» (42 onns) n'avess mai pensà tge fin che sia lètg prenda cun suttascriver il contract da nozza. Lura era ses um ina persuna amiaivla cun spiert avert. Plaun plaunet sa schluita en lur mintgadi violenza psichica ed economica ed a la fin er violenza corporala: «El ma vuleva mo per sasez e per nagin auter.» Oz è «Marie» divorziada, viva dentant en tema.

«Per amur per mes uffants e per mai»

Ina da las paucas dunnas, che raquinta avertamain da sia lètg en privel existenzial è l'englaisa Louise Hill. 20 onns era ella maridada cun in um perfid e violent, che smanatschava da mazzar ella ed ses uffants. Vers anora era el l'interprendider attractiv e cun success, envers la famiglia il tiran. Cun agid extern è Louise Hill finalmain vegnida libra. L'um ha sa prendì la vita.

«Il circul vizius» da Louise Hill

cuverta dal cudesch.
Legenda:RTR

Igl era en la Chasa da dunnas, che Louise Hill è vegnida intimada da scriver in cudesch da sias experientschas. La dunna englaisa, ch'aveva maridà in interprendider svizzer, aveva ramassà sin cussegl extern minuziusamain cumprovas per la violenza tar els a chasa. Cumprovas, quai raquintan er «Marie» e «Selina» en il film da Cuntrasts, èn fitg impurtantas per savair sa dustar avant las autoritads cunter persunas violentas.

En il cudesch descriva Louise Hill ils mecanissems da la violenza a chasa, che tschiffa las persunas violentas e lur victimas sco en ina spirala. Louise Hill descriva dentant er, co ch'igl era pussibel ad ella, da sa deliberar – per amur per ses trais uffants e per ella sezza.

Il cudesch è exaust. El sa vegnir empustà en la rait sin la pagina da l'autura sezza: www.louisehill.ch

Louise Hill è persvadida: «Jau hai stuì far quai per mes uffants, per mes mats.» Els hajan vesì da pitschen ensi, co che lur bab maltractia sia dunna. I saja eminent impurtant da mussar als uffants, che la vita saja autra – er per ch'els emprendian autras furmas da schoglier conflicts e na daventian betg sez ina giada persunas violentas.

«Mintga success da mai è ina victima pli pauc»

Cunter agressiuns san ins far insatge – tge, sa il cussegliader social Roman Grenal, che lavura tar il departament da Polizia e Giustia. Dapi il 2008 offrescha il chantun Grischun sustegn per persunas violentas – cun la hotline anonima e gratuita 079 544 38 63.

video
Violenza cunter dunnas – Nua datti agid en il Grischun?
Or da Telesguard dals 20.11.2020.
laschar ir

Sch'ina persuna vegn violenta ord stress cun ses conturn, sco per exempel pervi da raps, ils uffants u la lavur, èsi pussibel da gidar cun ina cussegliaziun. Quai vul dir 16-20 inscunters e lavur profunda cun e da la persuna violenta.

El en ses biro.
Legenda: Cussegliaziun anonima e gratuita - quai porscha il chantun Grischun cun il cussegliader social Roman Grenal a persunas violentas. RTR

Las persunas violentas èn per grondischma part umens. Radund 20 dad els vegnan annualmain tar Roman Grenal. Betg blers. Il cussegliader relativescha dentant: «Mintga um, che chatta in'autra soluziun che dad esser violent signifitga ina victima pli pauc – ed uschia in success da 100%.»

RTR Cuntrasts 17:25

Artitgels legids il pli savens

Scrollar a sanestra Scrollar a dretga