Siglir tar il cuntegn

Header

Tetel METTA DA FEIN
Legenda: METTA DA FEIN La seria-web METTA DA FEIN RTR
cuntegn

seria-web RTR La seria-web «METTA DA FEIN»

RTR producescha sin fin 2020 l'emprema seria-web ficziunala rumantscha dals auturs Carlo Beer ed Urs Berlinger. L'istorgia è in crimi umoristic e vegn filmà, tut tenor situaziun dal coronavirus, durant la stad a Vrin en la Val Lumnezia.

Oz consumescha in giuven public streams da Netflix, Disney+, Spotify & co. RTR è cun l’emprima seria ficziunala rumantscha perquai al puls dal temp ed al puls da noss public. La seria «Metta da fein» pon ins guardar sin rtr.ch, pia sin noss player RTR Play. Medemamein vegn ella publitgada sin nossas raits socialas sco Facebook, Instagram e Youtube.

La SRG sviluppescha actualmain en pli ina plattafurma da stream per l’entira interpresa, nua ch’i vegn ad esser pussaivel da consumar cuntegns cun suttitels er da las autras unitads sco RSI, RTS, SRF e sa chapescha er dad RTR. Er la METTA DA FEIN vegn publitgada sin questa plattafurma ed è uschia accessibla e chapaivla cun suttitels en l’entira Svizra.

Synopsis

En in vitget en la Surselva vegnan regularmain chattads animals cun chommas tagliadas giu. La pitschna cuminanza è tementada. Entant che plirs abitants crain vi d’in mitus, emprova il policist da sclerir il cas, quai però senza success. Ils mazzaments s'augmentan sco er la disfidanza dals abitants dal vitg. La seria da mazzaments finescha cun ina catastrofa a la festa dal vitg.

Carlo ed Urs durant chattar in bun lieu per filmar la seria-web METTA DA FEIN
Legenda: Carlo ed Urs durant chattar in bun lieu per filmar Carlo ed Urs durant chattar in bun lieu per filmar la seria-web METTA DA FEIN mad

Ils dus auturs e students da film Carlo Beer da Sedrun ed Urs Berlinger da la Sutsilvania tematiseschan en lur istorgia il mitus da la «Metta da fein» ch’ins enconuscha anc, oz en spezial en Surselva. Questa figura vegn per exempel descritta en la Crestomazia sco suonda: «La metta da fein ei ina femna veglia, nera e macorta, che sa zuppa el fain. Als affons che van el fain, taglia ella giu las combas cun sia fautsch». Participada al project è er la firma da producziun «Filmgerberei GmbH». Quest team planisescha e producescha la seria dal casting fin al tagl final.

Carlo Beer

Carlo Beer (*1985) è creschi si a Sedrun. Suenter l’emprendissadi da cuschinier ha el passentà tschintg onns a Los Angeles. Durant quel temp ha el cumenzà a scriver e da s’interessar per il film. Suenter che Carlo Beer è turnà en Svizra, ha el fatg la matura ed ha lavurà en differentas professiuns. Da 2015 tochen 2020 ha el studegià reschissur e librettist da film a la Scola Auta d’Art (ZHdK) e realisà plirs films curts. Carlo abitescha a Turitg.

Carlo Beer, 35 onns ed oriunds da Tujetsch
Legenda: Carlo Beer Carlo Beer, 35 onns ed oriunds da Tujetsch Jérémie Sarbach

Urs Berlinger

Suenter avair absolvì l’emprendissadi sco electromontader, ha Urs Berlinger entschet a s’interessar per il film. Grazia a studi autodidactic ha el acquistà sia emprima savida da la camera. Il 2014 è Urs Beglinger stà per in onn en l’Australia ed ha frequentà a Melbourne la scolaziun «Diploma of Screen and Media». Suenter in praticum sco cutter ha el fatg il studi da film a la Scola auta d’art a Turitg, la ZhdK. Il 2020 ha el terminà il studi cun il diplom da bachelor cun la spezialisaziun en il rom reschia.

Urs Berlinger, 30 onns ed oriunds da Beckenried a Sutsilvania
Legenda: Urs Berlinger, 30 onns ed oriunds da Beckenried a Sutsilvania Urs Berlinger, 30 onns ed oriunds da Beckenried a Sutsilvania mad

Tar ulteriuras dumondas:

Flavio Deflorin
flavio.deflorin@rtr.ch
079 282 15 46