Siglir tar il cuntegn
Inhalt

Cultura Scuvrir il plaschair da leger cun lecturas betg memia grossas

Dapi 1932 datti ils carnets da l’Ovra svizra da lectura per la giuventetgna OSL. En quels onns èn vegnids publitgads sur 2'500 numers cun litteratura actuala en tut las linguas svizras.

Ils novs carnets OSL in sper l'auter.
Legenda: Ils novs carnets OSL. RTR, Esther Krättli
L'illustratura Madlaina Janett cun il carnet OSL «Corniglias/Alpendohlen».
Legenda: L'illustratura Madlaina Janett cun il carnet OSL «Corniglias/Alpendohlen». RTR, Esther Krättli

En quests dis vegnan preschentadas novas ediziuns en quatter idioms rumantschs. Sper quatter carnets cun istorgias per uffants e giuvenils, è vegnì or er in cudeschet cun lirica. «Corniglias/Alpendohlen» cuntegna 14 poesias da l’autura tudestga Angelika Overath che viva dapi 10 onns a Sent en Engiadina Bassa. Las bellischmas illustraziuns èn da la giuvna illustratura Madlaina Janett.

En «Il giattin Rosalind» vai per ina giatta cotschna che nascha en ina famiglia nua che tuts èn nairs. Quai dat in pau problems, ma ella daventa tuttina in star. Spezial è er Raoul, il vulcan. Avant ch’el explodescha, toffa el dad ovs marschs. Ma ils dinosaurs acceptan quai ed els daventan amis.

Il carnet surmiran porta il titel «Lilo e Balz» e cuntegna 27 istorgias or dal mintgadi dad uffants. Las scenas en furma da comics èn las inas legras, autras èn pli tristas, ma tuttas mussan ch’ins po cuntanscher tut cun l’agid da buns amis. Cuntanschì ina pluna han ils «Campiuns da ballapei» da l’OSL en sursilvan. En lez vai per la dumonda co che Ronaldo u Shaquiri èn daventads ils stars che nus admirain.

RR actualitad 08:00