Siglir tar il cuntegn
Inhalt

Cultura «Schifoan und sunst nix»

La gievgia è vegnì preschentà a Turitg il pli nov roman dal scrivent e columnist Gion Mathias Cavelty. En «Der Tag, an dem es 449 Franz Klammers regnete» trametta l'autur grischun il skiunz austriac sin in viadi fantastic enavos en il passà.

Portrait.
Legenda: El fa svanir a Franz Klammer en ils nivels – il scribent e columnist Gion Mathias Cavelty. mad, Pascal Mora

Punct da partenza è la famusa cursa rapida als campiunadis mundials 1976 ad Innsbruck nua che Klammer vulaiva sa revantschar ed esser pli spert che Bernhard Russi che era ì quatter onns avant a Sapporo cun la medaglia.

Ma hoppala: Klammer na riva mai giu, el svanescha tuttenina.

Franz Klammer sparescha durant sia cursa da las cursas en ils nivels

Enstagl da finir la cursa sa metta Franz Klammer en viadi enavos vers il mument cur che tut ha cumenzà e cur che tut era anc autentic e genuin.

Cuverta dal cudesch, er fantastica.
Legenda: Il Franz Klammer da Gion Mathias Cavelty è en viadi tras munds fantastics. mad

El entaupa las differentas culturas e sto adina puspè sa dumandar tge ch’è misteri, tge ch’è vair e tgi ch’el sez è. Ses pli grond giavisch è turnar en sia patria e far quai ch’el fa gugent: ir cun skis, «Schifoan und sunst nix».

In viadi fantastic ch'è in zic dapli che be «Schifoan und sunst nix»

«Der Tag, an dem es 449 Franz Klammers regnete» è ina lectura ideala per tut quels che entran gugent en munds fantastics, che han plaschair vi da nonsens e che na prendan betg tut uschè serius.

Il cudesch da Gion Mathias Cavelty datti er sco gieu auditiv che SRF ha producì.

RR actualitad 08:20