Siglir tar il cuntegn

Header

cuntegn

Scenaris per il futur Co vinavant cun la populaziun en il Grischun?

Il chantun Grischun ha laschà actualisar ils scenaris per il svilup da la populaziun fin l'onn 2050, cun metter pais sin il svilup regiunal e communal. La basa per quels èn ils scenaris da l'Uffizi federal da statistica. L'interpresa «Wüest Partners» ha creà trais variantas: In scenari «AUT», che quinta cun in augment da la populaziun; in scenari «BASS», cun ina reducziun da la populaziun. Il scenari «INTERMEDIAR» n'è betg visualisà en quest artitgel.

Cun facturs da regulaziun po il svilup vegnir adattà per las differentas regiuns e vischnancas. Uschia pon ins per exempel implementar meglieraments regiunals da l'infrastructura.

Facturs per in augment da la populaziun:

  • Immigraziun
  • Naschientschas
  • Immigraziun supplementara pervi da facturs da regulaziun

    Facturs per la reducziun da la populaziun:

  • Emigraziun
  • Mortoris
  • Emigraziun supplementara pervi da facturs da regulaziun

Cumparegliar chantuns e la Svizra

Avrir la box Serrar la box

L'Uffizi federal da statistica metta a disposiziun ils pli impurtants fatgs davart il svilup spetgà da la populaziun en Svizra ed en ils chantuns.

Quà pudais cumparegliar las cifras dals chantuns e dals differents scenaris.

Las regiuns dal Grischun

Era en il scenari AUT vesan ins che la populaziun crescha mo en las regiuns plitost urbanas en il nord dal chantun, dal Plaun fin a Landquart ed il Partenz e Tavau. Tar il scenari BASS sa reducescha la populaziun en l'entir chantun. Fitg marcant è la differenza tar il Partenz/Tavau. La vischnanca da Tavau sviluppescha in concept per porscher dapli spazi d'abitar.

La populaziun vegn adina pli veglia

Adina dapli persunas vegnan pli veglias che 100 onns. En la Svizra datti actualmain bunamain 1'900 abitants ed abitantas ch'han surpassà ils 100 onns. Vi da la statistica vesan ins era cleramain, che dunnas vegnan pli veglias ch'umens.

En il Grischun hai dà il 2021 43 persunas naschidas avant 1922.

Linguas impurtantas en il chantun

Sper las trais linguas uffizialas dal Grischun, tudestg, rumantsch e talian vegnan anc duvradas differentas autras. Sco lingua principala han bleras persunas era inditgà portugais, englais e franzos. Mintga persuna ha pudì inditgar fin a trais linguas principalas. Ulteriuras linguas fissan anc:

  • Bosniac
  • Montenegrin
  • Serb
  • Albanais
  • Spagnol
  • Tirc

En la grafica n'è tudestg betg inditgà, per meglierar la visibilitad da tschellas linguas. Radund 127'000 persunas han inditgà tudestg sco lingua principala.

RTR actualitad 17:00

Artitgels legids il pli savens