La schurnalista rumantscha Paula Nay survegn il premi spezial da medias da la conferenza dals uvestgs svizzers. Ella vegn undrada per ses film «Suenter la plievgia vegn il sulegl», ch'ella ha fatg en il rom dals Cuntrasts. Il premi è dotà cun 1'000 francs. Igl è l'emprima giada che quest premi spezial vegn surdà.
En il film da Cuntrasts «Suenter la plievgia vegn il sulegl – in omagi a mia tatta» raquinta Nay l’istorgia da sia tatta attempada che saja – sco la conferenza dals uvestgs scriva – francada en la vita, en la speranza ed en la cardientscha. Il film saja plain charezza.
Mes omagi a mia tatta è in film persunal che ma stat fitg a cor. Jau hai grond plaschair ch’el ha persvadì la giuria.
Sper il premi spezial vegn surdà il premi catolic da las medias che va quest onn a Nicole Freudiger da Radio SRF. Ella survegn il premi per in’emissiun davart glieud giuvna che va en claustra. L'emissiun «Nonne mit 27 – warum junge Menschen heute noch ins Kloster ziehen» ha persvadì la giuria cun ina buna dinamica ed ina gronda sensibilitad per il tema. Quai demussia il grond inschign da l'autura. Il premi è dotà cun 2'500 francs.
Sper quels dus premis pudess la giuria era undrar ina persuna cun in premi da promoziun. Sin questa pussaivladad ha la giuria dentant desistì.
La surdada dals premis ha lieu ils 24 d’avrigl 2024 en la Chasa da las Religiuns a Berna.
