Siglir tar il cuntegn

Header

Navigaziun

cuntegn

Cultura La tschertga da datas da museums è uss digitala

Dal 2013 fin il 2016 han la Biblioteca chantunala, il Museum retic ed il Museum da la natira digitalisà ina pruna da lur collecziuns ed objects. En total èn publitgadas ussa 368'800 datas che lubeschan in'infurmaziun cumplessiva davart impurtants bains culturals da las trais instituziuns.

La Biblioteca chantunala ha digitalisà radund 6'500 films, videos e documents da tun e passa 360'000 indicaziuns da catalog. (ils cedels en ils truchlets èn ussa digitalisads e stattan a disposiziun en la rait). Rimnar questas datas è fruntà sin grond interess, quai ha ditg la bibliotecra chantunala Petronella Däscher. Dad instituziuns e privats hai dà intginas donaziuns. In dals pli vegls films è da Richard Caflisch che mussa il quartier da Lürlibad a Cuira ils onns 1920.

Museum da la natira ha fin 500'000 objects

Dapi l'onn 2002 ha il museum chantunal cumenzà da cataloghisar ils objects sin moda digitala. Grazia al project da l'Uffizi da cultura ha il Museum da la natira pudì digitalisar tut ils preparats da mammals ed utschels, tut ils preparats da peschs,amfibis e reptils. Quai n'èn dentant anc ditg betg tut ils objects. Sco quai che Ueli Rehsteiner, il directur dal museum, ha ditg, cumpiglia las radund 180 collecziuns da plantas, animals, fossils, minerals e crappa radund 300'000 fin 500'000 objects.

Da radund 10'000 objects hajan els digitalisà las «metadatas» (in document cun las indicaziuns principalas da l'object). Aschia èsi pussaivel da s'infurmar davart tscherts objects. Cunquai che ina gronda part da las collecziuns n'èn anc betg digitalisads na datti dentant il mument anc nagina funcziun da tschertga en il catalog da collecziuns.

Museum retic ha lantschà il catalog digital

En connex cun il project da digitalisaziun ha il Museum retic transferì las datas internas digitalas en il catalog public. L'entira collecziun dal Museum retic cumpiglia radund 100'000 objects. 90% da quests objects n'èn però betg exponids per motivs da plaz. Quests objects èn magasinads en in local per proteger bains culturals. Grazia al nov portal online èn dentant er quests objects ussa vesibels en la rait. Per l'emprima fasa dal catalog online ha il Museum retic mess la paisa sin las collecziuns: grafica, textilias e numismatica (munaidas). Il mument èn radund 13'000 datas en il catalog online.

RR actualitad 17:00

Fatgs

  • Il Museum retic ha digitalisà 13'059 datas (graficas, textilias, 190 datas da la collecziun da munaidas)
  • Museum da la natira ha digitalisà 10'948 datas ord las collecziuns erbarium, peschs, amfibis, reptils, mammals, utschels, fossils, verms, litgen e molluscs
  • Biblioteca chantunala ha digitalisà 6'500 films, videos, documents da tun