«En il podcast MALINCLETTIENTSCHAS discutan Lucia Parolini e Ronja Muoth a moda e maniera lucca da problems che mintga Rumantscha e mintga Rumantsch enconuscha: discurrer cun insatgi d’in auter idiom. Tge malchapientschas e legras situaziuns che quai po dar, udis vus en quest podcast.» – Uschia avain nus preschentà a vus noss emprim podcast avant 4 onns.
Revival 2024
Oz discurrin nus da quest temp, laschain reviver ils pli leghers muments e riain da nossa moda e maniera sco giuvnas da 21 onns. Ma nus avain era dumandà vus tge pleds che vus chattais curius en tschels idioms ed avain fatg ina nova episoda.
In pitschen success :)
Malgrà ch'il podcast è cunzunt naschì pervi da la mancanza da lavur durant l'entschatta da la pandemia, essan nus tuttina in zichel loschas che noss podcast n'ha betg mo divertì nossas audituras e noss auditurs, mabain ch'el è part da l'exposiziun speziala davart linguas en il Museum naziunal a Turitg. Er en scola vegn noss podcast tadlà. En il med d'instrucziun da rumantsch dal chantun Grischun datti in quiz ch'ins po far suenter avair tadlà tut las episodas.
Qua poss empruvar da respunder a las dumondas!
MALINCLETTIENTSCHAS – il podcast
En las emprimas episodas vai per malchapientschas tranter persunas da la Surselva e da l'Engiadina Bassa. Pli tard vegnan er ils auters idioms tractads, ensemen cun giasts surmirans, sursilvans, jauers e puters.
Bun divertiment!
Episoda I: En sortida
En l’emprima episoda da noss podcast vai per las malchapientschas ch’i sa dar, sch’ins va en sortida cun in Vallader ed ina Sursilvana.
Perquai giain nus cun vus ina notg en sortida e mussain tge leghers muments ch'i po dar pervi da la lingua.
Sch’in Vallader discurra da «far sü üna», pensa la Sursilvana a tut insatge auter – la soluziun udis en il podcast!
Episoda II: En il mintgadi
En la segunda episoda dal podcast MALINCLETTIENTSCHAS vai per las malchapientschas ch’i dat en il mintgadi, sch’ins discurra cun insatgi da l’Engiadina/Surselva.
Tranter auter discutain nus dals confamigliars, quai che ha grond potenzial da conflict.
Ma tadlai vus!
Episoda III: Pleds curius
En la terza episoda ha mintgina da nus elegì in pèr pleds ch’ella chatta curius en l'auter idiom. Daco che quel pled è curius e co che mintgina chapescha quel discutain nus en questa episoda.
Per exempel: schubergiar la buis vs. pulir/nettegiar il schluppet.
Per dapli, cliccar qua!
Episoda IV: Voss pleds surmirans
En questa episoda discurran Lucia Parolini e Ronja Muoth ensemen cun la Surmirana Lea Spinatsch dals pleds che vus avais tramess a RTR. Daco che «pender si umans» u «far momas» ha potenzial da conflict, udis en la quarta episoda.
Bun divertiment.
Episoda V: Voss pleds jauers
En la tschintgavla episoda vai per il jauer da la Val Müstair e quai era puspè cun in giast, numnadamain cun Livio Foffa. Nus discurrin davart «il temps, temp, taimp, e l'aura» ed anc bler dapli – ma tadlai vus!
Episoda VI: Voss pleds sursilvans e puters
En la sisavla episoda èn perfin dus giasts da la partida - il Sursilvan Silvan Muoth ed il Puter Patrick Barros. E fertant che l’Engiadinais craja ch’in «truffel» saja ina bestga sursilvana, chapescha il Sursilvan, sch’el auda «i spüzza» insatge tut auter ch’il Ladin.
Fa in clic qua per l’entira episoda.
Episoda VII: Cuschinar
En questa episoda emprovan Lucia Parolini e Ronja Muoth da cuschinar insatge ensemen – pli simpel ditg che fatg! Fertant che Lucia pensa sch'ella auda «pischada» a la tualetta, n’è Ronja anc adina betg segira, sch’ins mangia «culazchun» la damaun, a mezdi u la saira.
Bun divertiment.
Episoda VIII: Blastemmas
En la davosa episoda vai per blastemmas/smaladicziuns. Lucia Parolini e Ronja Muoth discurran cun la linguista Anna-Alice Dazzi. Ellas sa deditgeschan a dumondas sco: Daco duvrain nus animals per blastemmar? Daco dattti uschè bleras blastemmas per dunnas, ma betg per umens? E daco datti blastemmas curiusas sco per exempel «ti macarun» u «ti chanster»?
Ma tadlai vus!
