Siglir tar il cuntegn

Header

cuntegn

In focus tematic da RTR Il Grischun en 100 onns

Co guarda il Grischun ora en 100 onns? Èn nossas valladas anc populadas? Datti avunda spazi d’abitar? Svaneschan noss glatschers? Avain nus anc aua? Dovri insumma anc la chatscha u pudain nus surlaschar la regulaziun a la natira? Tge capita cun nossa lingua? RTR prova da dar in sguard en il futur.

Avais Vus era gia ina giada fatg ponderaziuns co che noss chantun pudess guardar ora en 100 onns? Tge datti anc? Tge betg pli? Tge svilups spetgan nus? Co vivain nus ensemen? Sa fatschentar cun l'avegnir, sviluppar scenaris per l'avegnir, crear visiuns, provocar ed animar da reflectar: quai è il project «il Grischun en 100 onns». Durant radund trais mais vegn RTR a rapportar davart co che noss chantun pudess sa sviluppar ils proxims 100 onns.

audio
Prevista sin program
ord Actualitad dals 26.09.2022.
laschar ir. Durada: 4 minutas 55 Secundas.

Quai faschain nus cun guardar concret sin las suandantas tematicas:

  • Convivenza
  • Natira ed ambient
  • Viver e mobilitad
  • Turissem
  • Ideas ed impuls

Per guardar enavant ston ins mintgatant era guardar enavos. Uschia vegnan per exempel a pled persunas pli veglias che raquintan co ch’ellas han passentà ils ultims 80-100 onns e tge tips ch’ellas han per la proxima generaziun. In sguard enavos datti er en la seria «Retrospectivas» da las scolaras e scolars da la FHGR. Els guardan da l’avegnir enavos sin il temp dad oz. En il format «100 dumondas a...» respunda il public dumondas da la vita ed en differentas columnas raquintan persunas davart «Ses giavischs» per il futur. RTR dat era in sguard sin la situaziun dals glatschers ubain sin il svilup dals animals en il futur. Quai è mo in pitschen schatg da quai che spetga Vus ils proxims trais mais.

Sin nossa pagina www.rtr.ch/gr100onns ubain era via tut noss vecturs pudais Vus suandar tut quai che cura e passa.

Avais era Vus gust da participar?
Tge èn Voss giavischs, Voss quitads, Vossas visiuns per il futur? Gugent publitgain nus era Vossa vista.
Tramettai a nus Voss resun a input@rtr.ch.

Era ils pitschens pon participar al project e participar a la concurrenza da scriver e/u dissegnar.  

Il Grischun en 100 onns

Artitgels legids il pli savens

Scrollar a sanestra Scrollar a dretga