Tschintg persunas ch'èn datiers dals 100 onns raquintan da lur vita e dal svilup ch’ellas han fatg tras ils ultims 100 onns.
Cecilia Hendry-Schmid *1923
Cecilia Hendry-Schmid è creschida si sco veglia da nov uffants en ina famiglia da purs a Cavorgia. Ensemen cun ses um ch'è era creschì si a Cavorgia ha Cecilia pli tard medemamain fatg la pura. Il pèr ha gì sis uffants. Oz viva Cecilia Hendry-Schmid ch'è dapi bunamain 40 onns vaiva, a Sedrun.
Paula Willi *1938
Paula Willi è naschida sco emprima da quatter uffants e creschida si a Lantsch. Cura ch'ella aveva nov onns è ses bab ch'era fravi a Lantsch morts. Paula Willi n’a betg pudì emprender insatge, ils daners mancavan. Ella ha lavurà differents onns en il service. Cun 28 onns è ella vegnida en speranza. Il bab da ses uffant, in um ch'era gia maridà. Cun agid da sia mamma ha Paula Willi tratg si suletta sia feglia.
Oswald Toutsch-Giacomelli *1930
Il bab dad Oswald Toutsch è mort cura ch’Oswald aveva dus onns. Cun sia mamma e cun ses frar vegl è il buob creschì si sin il Pass dal Fuorn. Là manava la mamma in pitschen hotel. Cun ils onns han Oswald Toutsch e sia dunna Ida surpiglià il manaschi da famiglia. Dasperas ha Oswald Toutsch lavurà durant 20 stagiuns sco camarier en il Palace a San Murezzan. Dal 1971 fin 1991 è Oswald Toutsch stà president communal da Tschierv.
Isidor e Tonia Pelican-Degonda *1929 e *1931
Ils geniturs d’Isidor Pelican èn vegnids avant bunamain 100 onns da Vrin a Surrein ed han surpiglià là sco migiurs il bain puril Bubretsch. Là è Isidor creschi si cun trais fragliuns. Tonia Pelican-Degonda è era creschida si a Surrein en ina famiglia da purs, sco emprima da sis uffants. Isidor e Tonia han medemamain gì sis uffants ed han fatg il pur e la pura sin il bain puril a Bubretsch. L’entschatta d'october 2022 èn Isidor e Tonia Pelican sa decididas da sa render en la Casa sogn Giusep a Cumpadials.
