Siglir tar il cuntegn

Header

video
Il Grischun en 100 onns: la lieur alva e la midada dal clima
Or da Telesguard dals 11.11.2022.
laschar ir. Durada: 4 minutas 50 Secundas.
cuntegn

Grischun en 100 onns La lieur alva è periclitada

Il pli bel pail alv d’enviern na gida nagut per sa zuppar sche la naiv manca. Per la lieur alva ina strategia problematica en vista a la midada dal clima.

Adina pli pauca naiv, envierns pli curts e temperaturas pli autas. Entirs spazis da vita sa midan plaun a plaun e quai percorschan era animals sco per exempel la lieur alva u la giaglina alva che midan lur vestgi brin da stad cun in alv d’enviern. Senza naiv èn ellas bain visiblas sin lungas distanzas per lur predaturs.

audio
Grischun en 100 onns: la lieur alva e ses svilup
ord Actualitad dals 11.11.2022.
laschar ir. Durada: 2 minutas 53 Secundas.

La lieur patescha da sia strategia

Tenor il biolog da selvaschina Flurin Filli po questa strategia esser ina trapla mortala per questas spezias. In pau plinensi pon quellas bestgas anc mitschar dal chaud però quel spazi daventa adina pli pitschen ed insacura en il avegnir vegn quel ad esser svanids. Il pli simpel fissi sche la lieur alva na midass betg pli il vestgi da stad cun quel d’enviern u sch'i avess propi naiv.

La lieur na decida però betg sezza sch'ella mida pail e cura che ella mida quel. Quai vegn dictà tras la lunghezza dals dis e la posiziun dal sulegl. Tenor il biolog saja la lieur abla da midar quai entras ina evoluziun genetica. In tal process dura però plirs millis onns, vul dir che quel dovra bler dapli temp co quai che la midada dal clima dat ordavant.

Lieur alva e lieur brina mitschan en il guaud

Cun ina lavur scientifica durant ils davos onns ha il biolog da selvaschina, Flurin Filli, constatà che la lieur alva na mitscha betg be envers ensi dal chaud, mabain era engiu en il guaud, en il medem habitat sco la lieur brina. La lieur brina è ina spezia parenta cun la lieur alva, però adattada meglier a la chalira. Che la lieur alva e la brina sa cruschan mintgatant era enconuschent e ch'i deva ibrids. Ils novs studis laschan sperar il biolog che ils ibrids pudessan esser fritgaivels. Tge che quai vuless dir per la lieur alva, sche quai pudess esser siu salvament en vista a la midada dal clima u forsa perfin la fin definitiva, saja memia baud per dir, manegia il scienzià Flurin Filli. Sia prognosa è stgira per l’avegnir da la lieur alva en las alps. La midada dal clima saja tenor el simplamain memia sperta per che la lieur possia chattar ina nova strategia e s'adattar geneticamain.

RTR actualitad 17:00

Artitgels legids il pli savens

Scrollar a sanestra Scrollar a dretga