Siglir tar il cuntegn

Header

audio
Bunura: Co èsi stà als Dis da litteratura?
Or da Actualitad dals 04.11.2019.
laschar ir. Durada: 07:11 minutas.
cuntegn

Dis da litteratura 2019 Domat a la riva da la mar

Era sch'igl è stà plitost grisch e bletsch è Domat questa fin d’emna stà a la riva da la mar. Ils Dis da litteratura èn navigads quest onn sin la mar ed autur ed auturas han preschentà texts maritims.

«I na basta betg da star sin terra ferma per chapir la vita» e «lingua è la bartga che ans permetta da navigar», quai èn mo duas observaziun ch'ins ha udì questa fin d’emna al Dis da litteratura. Il motto da quest onn, «(A)mar» ha stimulà auturas ed auturs, moderaturas ed il public da Domat da sfunsar en la mar, filosofar davart la mar e dechantar la mar.

Video
Dis da litteratura – ils highlights
Or da Telesguard dals 04.11.2019.
laschar ir

La mar, lu mare, la mer, die See

Il venderdi saira ha l’ensemble «Gufo Reale» cun la chantadura Manuela Tuena gì premiera cun lur program «MareMonti», in viadi musical-sensual a las pli differentas rivas da la Mar mediterrana. E la sonda saira han Corin Curschellas cun ina band ad hoc da vaglia intgantà il public cun ina ghirlanda da songs maritims, ch'èn vegnids accumpagnads da differents texts rumantschs ord tschintg tschientaners che tractan la mar. Ed era la revista annuala «Litteratura 38», preschentada a Domat, raquinta quest onn da mariners alpins e bramas (a)maras.

Andi Schonz e Corin Curschellas sin il palc a Domat
Legenda: Dal mariner chi mai nu va Andi Schnoz e Corin Curschellas sin il palc sonda saira a Domat. RTR

Domat, il punct da cristallisaziun per la litteratura rumantscha

Sco mintg’onn èn ils Dis da litteratura dentant era stà lieu e plattafurma per auturs ed edituras da preschentar ovras e publicaziuns novas:

  • Gist duas dunnas ladinas ha preschentà a Domat lur novas collecziuns da poesias. Tina Planta-Vital ses segund cudesch «il blau tocca la terra», e Flurina Badel ses «tinitus tropic»
  • «Alla riva dil lag / Abends am See» sa numna il nov cudesch che cumpiglia poesias e raquints curts ord il relasch da Lothar Deplazes barmier, che avess pudì festivar quest onns ses 80avel.
  • A lecturas e lecturs giuvens sa drizzan il cudeschs «Semperverd» da Simona Demarmels, in’istorgia da fantasy illustrada da Jon Bischoff, sco era il «Dicziunari per uffants», edì da la Lia Rumantscha.
Karin Kohler, Silvana Demarmels e Jon Bischoff sin il palc a Domat
Legenda: Semperverd La moderatura Karin Kohler-Pattis, l'autura Simona Demarmels e l'illustratur Jon Bischoff RTR

Ils Dis da litteratura n’èn dentant betg mo cudeschs e texts. Il comité d'organisaziun ha puspè dà spazi per experiments litterars e per vistas sur las saivs rumantschas ora. Sco per exempel la «revue» musical-litterara da la sonda saira, realisada e concepida bel ed aposta per il Dis a Domat, ubain il project da translaziun «Lyrischer Wille», nua che autura e scrivents pratitgeschan il gieu da telefon a moda litterara.

Ed era linguisticamain pasculeschan ils Dis da litteratura gugent sut la saiv ora: Betg mo cun il concert da venderdi saira en lingua taliana, mabain er sin il palc a Domat. Per exempel cun l’autur tessinais Alberto Nessi, il Svizzer tudestg Catalin Dorian Florescu ubain Rut Plouda e Dumenic Andry che han entretschà en ina prelecziun da tandem lur texts rumantschs cun las translaziuns franzosas. A Domat han ins er discutà ils cudeschs dad Arno Camenisch «Herr Anselm» e «Tod in Venedig» da Romana Ganzoni edids en lingua tudestga.

Auturs ed auturas sin il palc a Domat
Legenda: Dretgs umas e litteratura Ils auturs Göri Klainguti, Leo Tuor, Alberto Nessi, la moderatura Annatina Nay e Catalin Dorian Florescu. RTR

Il proxims Dis da litteratura han lieu dals 6 enfin il 8 da november 2020, alura per la 30avla giada.

Fotografia dal teater Sar Widerstand e sia maschina da furtüna
Legenda: La maschina da fortuna Nikolas Stocker ed Annina Sedláček han divertì a grond e pitschen cun lur spectacul umoristic: Tge porta fortuna? E tge far cun la fortuna? RTR

RR actualitad 07:00