Il ticker è a fin
-
15:55
Ils 29avels Dis da litteratura èn a fin …
… e tradiziunalmain fa la vischnanca burgaisa da Domat in pled da cumià. Theo Haas engrazia per l’engaschi dals involvids e per la preschientscha dal public. Sara Hermann dal comité d’organisaziun concluda allura ils Dis da litteratura, quai cun intgins pleds poetics. Era nus da RTR engraziain per Voss’attenziun e terminain il liveticker. Dapli impressiuns suondan oz e damaun sur noss chanals online, da radio e da televisiun.
-
15:44
Bunas novas a la fin...
...l'artist Luis Coray è vegnì da vender in da ses maletgs da l'exposiziun «Collisiuns da munds cuntraris» ch'è stada da vesair en il foyer da la halla Tircal. Il retgav da 1'000 francs va a l'organisaziun d'agid Sea-Watch. La cumpradra vul restar anonima.
-
15:27
Sar Widerstand e sia maschina da fortuna
Po teater per uffants funcziunar en duas linguas? Gea: Annina Sedláček (rumantsch) e Nikolas Stocker (tudestg) mussan quai en il toc davart Sar Widerstand, in scienzià caotic. Quel ha l’idea da construir ina maschina che fa ventiraivel. Il toc umoristic ha mussà – dasper la comica – er ina dimensiun in zic filosofica.
-
14:53
Era ils pli giuvens na vegnan betg a la curta…
…quai durant la preschentaziun dal dicziunari d'uffants che sa basa sin il classicher da Richard Scarry ed è vegni edì da nov da la Lia Rumantscha.
Suenter il bainvegni da Gianna Olinda Cadonau, ha Flurina Plouda manà tras la preschentaziun cun integrar ils uffants en sala – quai a moda ludica. Per l'accumpagnament musical cun l'accordeon ha Curdin Janett procurà.
-
14:34
«Il vegl Russ»
Bab e figlia, Linard e Silvana Candreia, preschentan il cudesch «Der alte Russ», ina collecziun dad istorgias davart il migrant Peter Balzer dad Alvagni. Ina preschentaziun plaschaivla cun schatgs biografics davart la migraziun dal 19avel tschientaner, in fenomen che collia bleras Grischunas e blers Grischuns.
-
12:36
Dretgs umans ed interpretaziuns litteraras...
Avant gentar vegn preschentà sin il palc il cudesch «Menschenrechte. Weiterschreiben», il qual è vegnì edì il december 2018. En il cudesch interpreteschan, cumpletteschan e scrivan auturs ed auturas da l'entira Svizra ils 30 artitgels dals dretgs umans.
Ils auturs Cătălin Dorian Florescu, Alberto Nessi ed ils dus auturs rumantschs Göri Klainguti & Leo Tuor han era fatg part dal project ed han dà in schatg ord il cudesch sin il palc. En lur texts han els construi punts. Punts tranter texts giuridics e litteratura. Tranter il sistem democratic dad oz e la politica d'antruras sin plaz cadruvi, tranter il svilup professiunal davent dal«Head of» tar il sentiment da «Head off» uschè svelt ch'ins survegnia la visada.
In extract auditiv dal text «Quei pievel» da Leo Tuor:
-
11:36
In tinnitus betg dischagreabel, ma poetic
Flurina Badel è enconuschenta sco multitalent tranter art, poesia e schurnalissem. La dunna da Guarda ha preschentà sin il palc da Domat si’ovra da poesias «tinnitus tropic». Ella ha discutà las poesias cun l’editura Mevina Puorger. Spezial: La poetessa ha recità las poesias ordador, e per facilitar la chapibilitad mintgamai duas giadas. Era bun: Badel ha prendì la libertad d’interrumper las explicaziuns da l’editura che ha magari commentà l’ovra a moda insistenta – enstagl da laschar a l’autura ed a sias poesias il resun imparzial.
-
10:30
Viadi en in mund fantastic...
Simona Demarmels maina il public durant la prelecziun da ses cudesch da fantasy «Semperverd», en il mund da Lio e ses chaun Cookie, ils dus protagonists principals da l'istorgia. Lio accumpogna ses chaun a chatscha da muntanellas.
La chatscha sa sviluppa però pli spectacular che pensà e maina Lio e Cookie en in pajais magic, nua ch'els ston ademplir las pli diversas missiuns.
A plaid sin il palc vegn era l'illustratur dal cudesch, il Bregagliot Jon Bischoff. En il discurs cun la moderatura Karin Kohler raquinta el, tge ch'ha giavinà el il pli ferm vid quest project.
-
9:59
In sguard enavon sin il nov Chalender Ladin
L' ultim di a Domat cumenza cun la vernissascha dal Chalender Ladin 2020. L'editura Bettina Vital preschenta cun Sidonia Pazeller e Fadrina Hofmann, tge texts che spetgan ils lecturs e las lecturas en la 110avla ediziun dal chalender...
Sidonia Pazeller ha dà al public in schatg litterar davart dunnas cun flintas ed umens cun resalvas...
-
8:54
Ils Dis da litteratura van en la terza ed ultima runda...
...ma avant datti anc in bun café!