La finala è tut ì fitg spert. Bun in mez onn suenter avair scrit ora da vender l’entir manaschi pon Claudia e Giusep Columberg uss gia surdar La Furca en ils mauns d’ina famiglia gastronoma. Il prender cumià da l'Hotel Restaurant La Furca è collià cun bleras e grondas emoziuns. La Furca è stà durant passa in decenni il dachasa da Giusep e Claudia ch’han manà sur tut quels onns il manaschi cun corp ed olma.
Il davos menu ch’jau hai mess sin maisa en La Furca è stà in Cordon Bleu, e da quels hai jau fatg millis.
Il cuschinar è adina stà la gronda passiun da Giusep u il Pepi u il Jumbo sco quai che blers numnan el. Suenter ses emprendissadi da cuschinier ha el dentant per plirs onns mess la palutta e la chazzetta dad in maun e lavurà tar ina firma da bajegiar, quai sco camiunist e lura sco disponent.
Cun sa gidar, durant ils onns sco disponent, cun sia dunna Claudia che manava da lezzas uras ensemen cun sia cusrina il campadi Fontanivas a Mustér ha Giusep puspè chattà l’amur per la cuschina. E cun tschertgar il 2009 in’abitaziun a Mustér hajan els la finala gist cumprà in entir hotel, l’Hotel Restaurant La Furca.
Per legher hai jau magari ditg da gievgia grassa a mes um, lura tschüss enfin mesemna da la tschendra.
Giusep e Claudia Columberg n’èn betg mo gastronoms cun corp ed olma, els èn er dus gronds fans dal tschaiver. Blers onns èn els stads commembers activs da la musica da tschaiver Las Bagordas da Mustér. E n'avessan els da lezzas uras betg cumprà la Furca, lura fissan els forsa anc oz en la musica da tschaiver dian Giusep e Claudia cun in surrir.