«Angelina» da Dabu Fantastic emprenda rumantsch

Dabu Fantastic han edì lur nov album «DRINKS». Per far in viva sin «DRINKS» han els fatg ina visita en chasa RTR, mo qua ha noss moderatur Ivo Orlik spetgà sin els cun tut auters plans: el vul lur nov hit «Angelina» per rumantsch!

Laschar ir video «"Angelina" da Dabu Fantastic emprenda rumantsch»

"Angelina" da Dabu Fantastic emprenda rumantsch

1:59 min, Battaporta dals 9.9.2016

Sa chapescha avain prendì per cor lur messadi ed avain beneventà els en il studio RTR cun in viva. Quai ha fatg surstar bravamain ils dus turitgais – i saja l’emprima giada ch’els fetschian in viva sin lur album cun in moderatur. Gie, ils grischuns èn halt ospitaivels...

Suenter èsi lura vegnì serius per ils Dabu Fantastic, la missiun d’Ivo Orlik: far ina versiun rumantscha da lur hit actual «Angelina». Il text translatà sin in palperi ed in curt crash curs sto tanscher e gia vegn chantà e registrà.
E co els tunan per rumantsch...WOW!

«DRINKS» è il tschintgavel album da Dabu Fantastic

Strusch vegnì publitgà l’entschatta da quai mais, è l’album «DRINKS» gia vegnì celebrà sco il meglier insumma ord la plima da Dabu Bucher e DJ Arts, ils dus chaus davos Dabu Fantastic. In album bain maschedà cun in sound ch’ins po ordinar x insanua tranter pop e hiphop e chanzuns che raquintan ord la vita e fan buna luna.

Per preschentar l’album han ils dus turitgais prendì la via sut ils pais ed èn vegnids a Cuira tar RTR. Quai pudessan ins pensar – ma uschè n’èsi betg! Il grischun è daventà lur segunda patria. Ils motivs: l’amur, trais commembers da lur band e buns contacts ed amicizias.

Angelina per rumantsch