Siglir tar il cuntegn

Giud tribuna Concert d’inauguraziun en il LAC a Lugano – 25-09-2015

Vus pudais seser en l’emprima retscha da la sala da concert dal LAC, il nov center d’art e cultura a Lugano. RTR ha emess per Livestream il concert d’avertura cun la novavla sinfonia da Ludwig van Beethoven. «Ode an die Freude». Quai pudais vus tadlar il concert.

Legende: Video Concert d'inauguraziun dal LAC a Lugano abspielen. Laufzeit 86:00 Minuten.
Or da RTR dals 26.09.2015.

Avertura dal LAC – il nov center d'art e cultura a Lugano

LAC stat per Lugano Arte e Cultura. Ed uschè sa numna il nov center d'art e da cultura a Lugano. In center cun sala da concert e teater e cun in museum. Igl è in bajetg imposant! L'entrada che maina en il museum ed en la sala da concert e teater è ina halla cun ina suleta, immensa fanestra che lascha bunamain svanir il cunfin tranter dadens e dadora.

La sala da teater e da concert

800 meters quadrats, 1000 plazs da seser, ina conchiglia acustica, in foss sbassabel per l'orchester. Cun tut quels elements èsi natiralmain simpel da far ord ina sala da concert ina sala da teater e viceversa: dal concert sinfonic al concert da jazz, da l'opera a l'operetta u dal ballet al teater. Entras la collavuraziun da l'architect Ivano Gianola e da la firma Müller BBM a Minca s'uneschan sin quella moda l'estetica architectonica e la qualitad acustica.

Il museum

Il «Museo d’Arte della Svizzera Italiana» ha suttetg en il LAC. Qua na vign in museum per ina gia betg integrà – sco savens – en in bajetg existent; il bajetg è vegnì concepì da l'entschatta ennà sco museum. Las localitads ch'envidan a ruaus e contemplaziun sa chattan sin 2500 meters quadrats che sa repartan sin tschintg auzadas.

La novavla da Beethoven – Ussa, pli che mai!

Suenter sia otgavla sinfonia ha Ludwig van Beethoven spitgà indesch onns avant che scriver la novavla. In dals motivs: el era daventà surd. Plinavant sa sentiva el pli e pli esters avant ses publicum da Vienna, in publicum che daventava pli e pli superficial e dependent da consum e giudiment. En quella depressiun ha Beethoven cumenzà ad integrar sapientivamain en sia musica elements che furman in cunterpol a la realitad displaschaivla en il mund enturn el. Beethoven: «Wahre Kunst ist eigensinnig».

La novavla è daventada ina sinfonia trasatras particulara, incredibla e maiudida. Gia las emprimas trais parts èn mintgina ina capodovra. Ma co anc augmentar quella tensiun? Cun prender vitiers en la part finala in chor e chantadurs solists – ina revoluziun en ina sinfonia! E lura slargia Beethoven anc quai horizont cun metter en musica gist la poesia da Friedrich Schiller «An die Freude».

Seid umschlungen, Millionen! Diesen Kuß der ganzen Welt! Freude, schöner Götterfunken Tochter aus Elysium.

In simbol per idealissem, per optimissem e per pasch!

Sco ditg: il cunterpol a la realitad displaschaivla en il mund enturn el. E quai vala ussa, il 2015, pli che mai!
Il tema principal «An die Freude» en la part finala da la sinfonia è dapi il 1985 l’imni uffizial da l'Europa.

Ils interprets

Orchestra della Svizzera Italiana
Chor da Radiotelevisiun Svizra
Solists: Christiane Oelze, Anna Bonitatibus,
Christoph Strehl, Olafur Sigurdarson
Direcziun: Vladimir Ashkenazy