Siglir tar il cuntegn

Header

audio
En memoria da Carli Elvedi
Or da Artg musical dals 03.04.2022. Maletg: MAD
laschar ir. Durada: 57 minutas 57 Secundas.
cuntegn

Purtret Carli Elvedi

In um sco in culm, Lumnezian e benedì cun ina vusch remartgabla. Quai era Carli Elvedi (31.12.1932 – 7.02.2022), bassist e solist da grond renum en il Grischun.

Sche la professiun da musicist fiss stada pli segira per l'existenza en ses giuvens onns avess il chantadur manaivel pudì far ina carriera musicala. Uschia èsi restà per el ina passiun ed in hobi fin en l'auta vegliadetgna.

Uffanza a Cumbel

Carli Elvedi è naschì e creschì si a la porta da la Val Lumnezia, a Cumbel. Ensemen cun otg fragliuns haja el passentà ina bella uffanza, raquinta ses frar giuven Pius, che ha abità fin avant curt anc en la chasa paterna a Cumbel. Pius era il giuven da tuts, il frar giuven, e set onns pli giuven che Carli ch'era il segund giuven dals quatter frars. Sco Pius ha raquintà eran las pli bellas regurdientschas dad el las sentupadas dals fragliuns las fins da l'emna ed en spezial da Nadal, cura che tuts returnavan puspè en chasa paterna.

La famiglia Elvedi aveva in aug (barba) ch'era spiritual. Da temp en temp, cura ch'el aveva vacanzas ha quest aug magari fatg messa en la baselgia a Cumbel. L'aug aveva ina vusch speziala, bassa e chantava cun ferma vusch. Carli haja mintgatant imità a chasa per far legher questa vusch sonora da l'aug. Probabel haja el ertà quest organ da l'aug, manegia Pius. Propi dà en egl è la vusch da Carli lura cura ch'el era ord scola. Lura ha el cumenzà a s'engaschar en las uniuns dal vitg (musica e teater) e natiralmain chantà en il chor da vallada, il Chor viril Lumnezia.

Scolaziun da vusch

Sia vusch era ferma e bassa e lura ha Carli er prendì uras da chant a Vaduz ed uschia scolà sia vusch. Sco quai che Pius raquinta, na saja il dirigent dal chor viril Lumnezia, Gion Giusep Derungs 05 (annada 1905 e betg da scumbigliar cun il cumponist Gion Giusep Derungs (annada 1932) che viva a Cuira) betg stà uschè cuntent cun questas uras da chant. La vusch da Carli na saja betg pli uschè voluminusa, uschia aveva manegià Gion Giusep Derungs. Quest maini ha el lura revedì pertge Carli è daventà in bun e ferm solist, in bassist da vaglia ch'aveva sco idol Ivan Rebroff e tadlava er gugent il chor da cosacs.

Chant è dentant restà in hobi per el. Pli tard cura ch'el è sa chasà a Cuira ha el chantà en divers chors, tranter auter en il Quartet grischun viril (da Gion Antoni Derungs) ed en il Chor dils Larischs nua ch'el era ina ferma pitga durant decennis. Er sco solist ès el stà savens sin tribuna.

Carli Elvedi en emissiuns da RTR:

audio
En memoria da Carli Elvedi
ord Artg musical dals 03.04.2022. Maletg: MAD
laschar ir. Durada: 57 minutas 57 Secundas.

RTR Artg musical 14:00

Artitgels legids il pli savens