Siglir tar il cuntegn

Header

video
Artg Live - Concert commemorativ Duri Sialm e Flurin Camathias a Mustér
Or da Musica dals 04.11.2021.
laschar ir. Durada: 1 minuta 34 Secundas.
cuntegn

Artg musical Duri Sialm e Flurin Camathias

En l'emissiun vulain sa regurdar da duas da las pli marcantas persunalitads da nossa cultura indigena: Duri Sialm, cumponist e Flurin Camathias, poet e scrivent.

Quest onn avessan tant il cumponist Duri Sialm sco er il poet e scrivent Flurin Camathias in'anniversari radund. In bun mument per dar in sguard sin lur ovra e laschar reviver quellas. Simon Camartin e Giusep Giuanin Decurtins èn sa mess vidlonder da s'occupar cun vita ed ovra dal cumponist da Segnas sco er dal poet da Laax. Ed els dus èn sa mess a la tschertga ed er chattà intginas ivettas e schizunt ina perla, in «Ave Maria» anc nunenconuschent. En l'uniun da Mustér «La curturella» cun ses president Hans Huonder han els dus chattà in'uniun ch'è stada pronta d'organisar in concert commemorativ. En quel èn d'udir diversas chanzuns da chors enconuschentas e main enconuschentas dentant er ovras per chant solo e clavazin.

Duri Sialm (*3.7.1891 – 18.12.1961)

Ils 3 da fanadur 2021 èsi stà 130 onns dapi la naschientscha dal musicist, pedagog da musica e cumponist Duri Sialm, oriund da Segnas/Mustér e stà sesent a Cuira. Là è el mort ils 18 da december 1961. Betg mo quellas datas da vita han stimulà Camartin/Decurtins mabain en emprima lingia la qualitad da sias cumposiziuns vocalas ed instrumentalas.

Flurin Camathias (*6.3.1871 – 3.2.1946)

Ils 6 da mars 2021 èsi stà 150 onns dapi la naschientscha dal plevon, poet e scrivent Flurin Camathias, oriund da Laax. El è stà spiritual a Breil, Andiast e Siat. Mort è sur Flurin Camathias ils 3 da fanadur 1946. El vala sco in dals impurtants poets e scrivents rumantschs. Numerusas da sias poesias èn vegnidas messas en musica.

audio
Concert commemorativ Duri Sialm e Flurin Camathias
ord Artg musical dals 07.11.2021. Maletg: MAD
laschar ir. Durada: 1 minuta 57 Secundas.

Sialm & Camathias

Sper lur lavur individuala han Duri Sialm e sur Flurin Camathias er collavurà stretgamein l'onn 1924 vid il gieu festiv per la festa centenara da la Ligia Grischa a Trun. Intginas chanzuns da quai gieu èn daventadas veritabels hits (Schi ditg che stattan cuolms e vals, stai ferma Ligia grischa u Si sededesta Rezia nossa). Sper questas chanzuns dal gieu festiv datti aunc intginas autras cumposiziuns da Duri Sialm tenor poesias da sur Flurin Camathias, chanzuns per chor viril, maschadà e per chant da solo sco er divers tocs per clavazin.

Primaudiziun «Knoten»

Cuntradas e bajetgs sacrals dattan tempra tut speziala al caracter dals umans, uschia era la cuntrada enturn Mustér cun la claustra ed in tozzel ulteriurs bajetgs sacrals. Uschia n'èsi betg da far curvien che nus chattain er en las ovras da Duri Sialm fastizs cun ina relaziun directa a la cuntrada, baselgias e cultura. Sa basond sin quest patratg ha Simon Camartin surdà l’incumbensa ad in cumponist armen, ad Ashot Zohrabyan (annada 1945) da cumponer in’ovra che descriva sin moda musicala la correlaziun tranter cuntrada e lur umans.

Simon Camartin ha tarmess al cumponist maletgs da baselgias e capluttas da Mustér e numerusas infurmaziuns davart la musica da Duri Sialm e sia persunalitad. Uschia ha Ashot Zohrabyan scrit l’ovra «Knoten» per violina e clavazin. – «Knoten» («Nuvs») èn impurtants puncts da colliaziun. La baselgia da Segnas collia il mund cun il tschiel. A Segnas è Duri Sialm naschì e battegià e là ha el gia sco uffant sunà l’orgla. La baselgia claustrala collia medemamein tschiel e terra, pertge in pader da la claustra ha mussà a Duri Sialm da sunar clavazin ed orgla.

Ils interprets

Clau Scherrer e Cantus firmus

Avrir la box Serrar la box

Il 1999 ha Clau Scherrer terminà ses studi al conservatori statal a Vorarlberg ed è lura sa perfecziunà en ils roms clavazin e direcziun da chors. Il 1999 metta el en pe il Cantus firmus surselva. Quest chor da project sveglia adina puspè l'interess dal public. Dapi sia fundaziun tgira Cantus firmus surselva cun gronda attenziun la chanzun rumantscha.

Andriy Dragan

Avrir la box Serrar la box

Il giuven pianist (annada 1986) è naschì a Lemberg ed ha cumenzà cun sis onns a sunar il clavazin. Gia cun 13 onns ha el dastgà sunar cun il INSO Lviv Orchester ed al MENHIR music festival Falera. Ses studis ha el terminà a Basilea cun pliras distincziuns. Oz ha el preschentaziuns sco solist u musicist da chombra en Svizra ed en l'Europa.

Judit Scherrer

Avrir la box Serrar la box

La sora da Clau Scherrer ha studegià chant al conservatori Feldkirch ed al Sweelinck-Conservatorium van Amsterdam. Ella ha terminà omadus diploms da concert cun distincziun. Sper sias activitads sco solista lavura Judit Scherrer er sco pedagoga da musica.

Salome Cavegn

Avrir la box Serrar la box

La giuvna chantadura è naschida l'onn 2000 a Breil ed il chor dal gimnasi da la claustra Mustér ha sveglià sia fascinaziun per il chant. Ella ha cumenzà sia scolaziun da vusch tar Letizia Scherrer. Actualmain frequenta ella in studi a la Scola auta per art a Turitg cun il profil vocal-classic tar Dorothee Labusch.

Rinaldo Camathias

Avrir la box Serrar la box

Il tenor da Laax lavura sco sarrer da construcziun ed ha scolà sia vusch tar Werner Kuoni. Oz chanta el en pliras furmaziun da chor ed è era sco solist adina puspè activ en la regiun.

Giusep Bundi

Avrir la box Serrar la box

Gia sco uffant ha il bassist da Schlans scuvrì sia amur per il chant. El ha cumenzà a chantar en il chor d'uffants ed en il chor baselgia. Uras da chant ha el absolvì tar Armin Caduff, Letizia Scherrer, Rilana Cadruvi e Judit Scherrer. El conta dapi la fundaziun en il Cantus firmus surselva.

Oana Camartin

Avrir la box Serrar la box

La violinista oriunda da la Rumenia ha studegià musica a l'academia George-Enescu a Iasi. Plirs onns è ella stada commembra da la filarmonia statala rumena. Divers cumponists han scrit ovras en spezial per ella ed er deditgà ad ella cumposiziuns. Uschia er l'Armen Ashot Zohrabyan che ha cumponì l'ovra «Knoten» per ella.

Sialm ord l'archiv da RTR

Cunquai ch'il concert a Mustér n'ha betg durà duas uras avain pudì cumplettar l'emissiun dubla cun intginas ulteriuras ivettas da Duri Sialm ord noss archiv. Tranter auter datti er chanzuns per chor d'uffants u registraziuns dal Madrigalchor Cuira u las dunnas dal Chor da concert grischun. Plinavant pudain tadlar ils chors virils Ligia Grischa, Lumnezia e Trun.

Artg musical 14:00

Artitgels legids il pli savens