Cun la fugia da la Sontga Margriata daventa l'alp nunfritgaivla. Dapli che 1'000 onns pli tard n'è la plievgia anc adina betg turnada. Ussa sa tschenta la dumonda tge ch'ins po far per ch'i plovia puspè?
Il teater d'Asa Hendry tracta d'in ensemble da teater che sa prepara per ina producziun. Quella realitad actuala sa maschaida adina puspè cun la veglia legenda da la Sontga Margriata. Ils acturs e las acturas giogan pia mintgamai sasez ed anc in'autra figura. Entant ch'Asa Hendry gioga il paster pitschen, gioga Annina Sedlacek la Sontga Margriata e Lorenzo Polin il signun. Era il musicist Leander Albin e Nora-Li Hess ch'è responsabla per la mascra sa chattan sin tribuna.
«Jau hai gì grond plaschair da quella figura»
Dumandà Asa Hendry da scriver in toc da teater ha il reschissur Manfred Ferrari. Asa Hendry che studegia scienzia da teater e da gender manegia ch'i saja stà ina sfida d'inventar per l'emprima giada in teater. Sco basa ha Asa Hendry prendì la legenda da la Sontga Margriata e lura agiuntà agens elements. Quella figura cumpara era gia en sia ovra «Sin lautget». Asa Hendry pensa ch'ella saja probablamain il sulet caracter queer da la Rumantschia.
La Sontga Margriata d'ozendi èn tut ils «queer kids» che creschan si en las muntognas e sa sgrattan là vi da normas dal gender.
Adina na saja betg simpel da s'exprimer per rumantsch davart la tematica da gender, conceda Asa Hendry. I saja dentant era bel da pudair stgaffir ina lingua per pudair discurrer surlonder.
Dapli caracters queers
Dad ina vart vul Asa Hendry preschentar al public in teater rumantsch che sa referescha er ad in concret context rumantsch, pia qua a la legenda da la Sontga Margriata. Ils aspectaturs e las aspectaturas duain a la fin era sa tschentar la dumonda co els u ellas èn sezzas pertutgadas da la societad eteronormativa e patriarcala.
Jau crai che tuts e tuttas pateschan en in tschert grad da las structuras normativas.
Pertutgant la tematica da gender sa giavischa Asa Hendry tranter auter ina pli gronda represchentaziun queera en films, en la litteratura ed en las medias.
