Cuira steva en stretg contact cun la citad da Turitg ed ha sut quest'influenza gia decidì baud da midar confessiun e vegnir refurmà, di l’istoricher Florian Hitz.
Damai che l’agen plevon da la citad era in fidaivel da l’uvestg, ed exponents dal cussegl da la citad levan la refurmaziun, han ils da Cuira clamà la fin finala Johannes Comander, in predicatur evangelic da Maiavilla, a la baselgia da Son Martin per che lez refurmia la citad.
Nagins burgais catolics pli
Cun la refurmaziun ha Cuira survegnì anc dapli pussanza. Uschia ha la citad er surpiglià tut il possess da la baselgia catolica en vischnanca. Cun la refurmaziun il 1523 èn dentant er tut ses burgais vegnids refurmads.
Natiralmain devi anc adina catolics a Cuira, dentant n’eran quels betg pli burgais da la citad. Er baselgias catolicas na devi lasuenter betg pli en citad. Uschia ch’ils cartents catolics stuevan ir si en la curt tar l'uvestg per ir a messa.
Ils catolics turnan cun la Confederaziun
Pir cun la fundaziun da la Confederaziun il 1848, pia pli che 300 onns pli tard, han lura er puspè ils catolics pudì sa chasar a Cuira – grazia a la lescha ch’ins dastga sa chasar nua ch’ins vul en Svizra.
Uschia che la plaiv catolica a Cuira è creschida dapi sia fundaziun il 1923 adina pli e pli fitg. Oz è ella la pli gronda plaiv catolica dal Grischun cun bun 14’000 cartents. Ella è schizunt pli gronda che quella dals refurmads da Cuera cun bun 11’000 cartents.
RR actualitad 08:20