Siglir tar il cuntegn
Inhalt

100 onns Tista Murk Tista Murk e las bibliotecas

Ina gronda part da sia vita professiunala ha Tista Murk deditgà a las bibliotecas. Ed era en quel champ ha el fatg lavur da battastrada.

Suenter studis da linguas a Friburg, Berna ed a Paris, e suenter singuls onns da lavur per il Dicziunari Rumantsch Grischun e per la Confederaziun, ha el lavurà passa ina dunsaina dad onns (1946–1958) en la Biblioteca chantunala grischuna a Cuira. Là era el surtut responsabel per optimar il catalog tenor pleds-clav.

Dal 1969, suenter ses intermezzo da passa diesch onns sco redactur da radio e televisiun, turna el tar las bibliotecas. El vegn elegì quel onn sco directur da la Biblioteca populara svizra (BPS), in’instituziun che sa numna oz «Bibliomedia». Questa fundaziun s’engascha per il svilup da tut las bibliotecas ed ella vul promover en general che la populaziun haja in bun access a cudeschs ed insumma che la glieud legia bler.

Legende: Video Antenne: Tista Murk sco directur da las bibliotecas popularas abspielen. Laufzeit 03:42 Minuten.
Or da RTR dals 05.11.1970.

Tista Murk procura per svung

Cura che Tista Murk ha surpiglià il directori da la BPS, era l’instituziun daventada debla e vegniva perfin messa en dumonda. Però cun ses entusiassem ed engaschament ha Tista Murk pudì manar la BPS svelt en ina meglra direcziun. Sia finamira era da pudair offrir a l’entira Svizra, damai era en regiuns pli periferas e betg mo en ils centers, in access a la lectura en bibliotecas. Durant ses temp d’uffizi èn vegnidas fundadas numerusas novas bibliotecas communalas u regiunalas, era en il chantun Grischun. Per cuntanscher quai, aveva Tista Murk reorganisà la finanziaziun da las bibliotecas popularas. Enstagl da sustegnair quellas cuntinuadamain cun ina pitschna furniziun da cudeschs, ha el installà in sistem dad «agid da partenza», v.d. las biliotecas survegnivan a l’entschatta in brav import per etablir ina flotta biblioteca, ma ellas eran silsuenter sezzas responsablas per tgirar vinavant la collecziun.

Per ses merits sin il champ da las bibliotecas popularas è Tista Murk vegnì onurà quest onn 2015 perfin da la Scol’auta per scienzas applitgadas a Winterthur. Il nov edifizi da biblioteca da quella scol’auta porta ussa il num «Haus Tista-Murk».