Siglir tar il cuntegn

Header

Nesa Valentin en cuschina
Legenda: RTR
cuntegn

Nossa cuschina 27 onns plats engiadinais cun Nesa Valentin

Nesa Valentin ha 76 onns e ha durant ils ultims 27 onns manà ils curs da cuschinar «Engadiner Esskultur». Quai era in curs per indigens e giasts per emprender ad enconuscher plats tradiziunals da l'Engiadina.

Per Nesa Valentin da Sent è il cuschinar gia adina stà ina gronda passiun. Durant il november raquinta ella en l'emissiun «Nossa cuschina» mintga mesemna da sia passiun.

Suenter avair decidì ch'il gimnasi n'era betg quai ch'ella vuleva far, ha Nesa Valentin fatg il seminari sco magistra d'economia da chasa. Durant sia entira vita ha ella perquai cuschinà bler, pli tard lura era per la famiglia ed ella ha dà vinavant la passiun als quatter figls.

L'onn 1995 ha il president da Sent vulì porscher insatge per indigens e giasts. Perquai ha Nesa Valentin gì l'idea per il project «Engadiner Esskultur». Adina l'inviern èn fin 20 persunas sa radunadas en ina sala cun cuschina, nua che Nesa Valentin ha cuschinà fin set differents plats. Capuns, plain in pigna, nozzas dals vanzets ubain er bizochels da Sent eran adina fitg bainvis e populars. Quels plats cuschinava mo Nesa Valentin ed ils participants dastgavan degustar. In plat dentant avevan tuttas e tuts da gidar da cuschinar, la schuppa da giutta. Mintgin aveva da tagliar in pau verdura e sco dessert aveva Nesa Valentin alura preparà «puglinas da Sent».

Quels biscuits da nitscholas fa Nesa Valentin er anc oz, bunamain mintg'emna var 100 puglinas. Betg mo per ella, mabain per regalar. Ils fortunads èn musicists da societads da musica, acturs da gruppas da teater ubain er persunas che han ina festa pli gronda a Sent. Savens cuschina Nesa Valentin numnadamain era anc oz per gruppas pli grondas. La «Engadiner Esskultur» ha ella suenter 27 onns però smess.

Or da l'archiv: Nesa Valentin cuschina schuppa da giutta

video
«Ils Svizzers – Die Bündner» (4/x): Schuppa da giutta
Or da Telesguard dals 21.11.2013.
laschar ir. Durada: 4 minutas 15 Secundas.

RTR Nossa cuschina 10:15

Artitgels legids il pli savens

Scrollar a sanestra Scrollar a dretga