Siglir tar il cuntegn

Header

audio
Cun adattar l'avatar pons ins era gia cumprar opziuns.
RTR
laschar ir. Durada: 05:38 minutas.
cuntegn

Roblox, il gigant da games, cun sulegl e sumbriva

Roblox ei ina da las pli grondas plattafurmas da games dal mund – sche betg la pli gronda. Ina plattafurma ch'envida da vegnir ed emprender da programmar gieus che tuts pon lura participar sin la plattafurma. Però era ina plattafurma ch'ins po far daners, però betg uschè simpel.

Roblox datti dapi il 2006 – e dapi lura è la plattafurma creschida ad in gigant cun 200 milliuns users mintga mais, cun radund 20 milliuns differents gieus ed ina valita a la bursa che vegn schazegiada sin enturn 50 milliardas francs. Ina plattafurma che vul tenor atgnas indicaziuns promover las abilitads da programmar e viver sia creativitad. Perquei mettani era a disposiziun (pia gratuit) ils programs per far simpels gieus ed il spazi per arcunar quels. Uschèlunsch ina buna chaussa per far emprimas experientschas da programmar.

Far daners betg simpel – craps da stgarpitsch

Roblox pussibilitescha era da far fatschentas cun ils gieus ch'ins ha programmà. Però n'è quai betg simpel, sch'ins legia las cundiziuns da fatschenta, pia quai ch'è scrit pitschen. Roblox incassescha sez 75% da las entradas dals sviluppaders. Per cumparegliar: Apple che vala sco «char» incassescha tranter 12-30%. Pajà vegn mo eventualmain e diraglia pir sch'ins fa cun il gieu almain radund 1000 francs. Cunquai che Roblox ha in'atgna valuta «Robux» datti era in curs per midar ils daners. E sch'ins ha la finala propi dabun daners cun ademplir tut las cundiziuns menziunadas, lura è quel curs auter. Per cumprar 100'000 Robux pajan ins ca. 1000 francs. Sch'in vul però enavos quai, lura survegnan ins anc 350 francs pertut.

Fazit: Bun per cumenzar, main per far fatschentas

Igl è bain bun ch'i dat ina plattafurma cun programs e hosting gratuit per programmar e dar gieus - per far experientschas cun programmar. Sch'ins vul però far fatschentas u viver sco programmader da quai, lura èsi fitg grev (betg nunpussaivel) dad insumma survegnir daners – e surtut leger tut las cundiziuns da fatschentas, nua ch'ins dat giu bunamain tut ils dretgs d'utilisaziun da l'agen gieu a Roblox.

Dapli da «Il Digitip - il tip digital»avrir la landingpage

Scrollar a sanestra Scrollar a dretga