La Allianz SwissPass ha annunzià la fin november ch'i duai dar mez december ina nova carta dal SwissPass. Quella nova carta vegn er gist cun novas funcziuns. Uschia pon ins per exembel da nov er duvrar quella per avrir portas da la firma Legic ed ins po er duvrar ella per s'annunziar en l'internet cun il sistem Fast-Identity-Online-Standard u curt FIDO. Quel simplifitgescha da pudair s'annunziar per exempel tar Facebook u Google u er per il nov sistem da Microsoft Office 365.
E-ID senza controlla
La protecziund da consuments crititgescha ferm questa midada. Il pievel haja ditg Na ad ina e-ID che vegniss gestiunada entras firmas privatas. La Alliance SwissPass fetschia uss dentant gist il pass che la protecziun da datas haja temì: Els veglian introducir ina e-ID «entras la porta-davos» ed uschia nizzegiar ina largia en il sistem. Er in quità è che la protecziun da datas na vegnia betg resguardada bain avunda, perquai ch'i na dettia betg las directivas correspundentas.
Protecziun da consuments pretenda da spetgar
Uss pretenda la protecziun da consuments da la SBB e la Alliance SwissPass ch'els spostian la nova carta enfin che quests problems sajan schliads. Plinavant pretenda la protecziun da consuments che questas funcziuns sajan opziunalas. Pia che mintga persuna possia sezza decider a moda activa, sch'el u ella vul insumma far diever da questas funcziuns novas.
Alliance SwissPass pretenda da retrair renfatschas
I saja simplamain fallà. Ins n'introduceschia nagina E-ID cun la nova carta. La tecnologia FIDO2 (Fast-Identity-Online-Standard) saja ina procedura da standar per autentificar per s'annunziar pli simpel tar applicaziuns da terzs sco Google, Microsoft, Dropbox ed auters. Ed Alliance SwissPass n'haja nagin access ni a datas da cuntegn, ni a datas da transacziuns. Uschia pretenda l'organisaziun da la branscha dal transport public che la fundaziun per la protecziun dals consuments retiria sias pretensiuns.
