Il term «metaverse» è stà d'udir adina puspè il davos temp, quai en connex cun la midada da num dal concern da Facebook sin Meta. Cun quest pass vul il schef dal concern Mark Zuckerberg crear il mund virtual «metaverse».
Tge è il «metaverse»?
«Metaverse» è in mund digital nua che persunas pon interagir cun autras persunas che èn dentant en tut in auter lieu. Pia vegnir ensemen virtualmain malgrà ina distanza fisica. Pussaivel è quai cun egliers da VR, virtual reality. Cun agid da quels pon ins entrar en in mund da 3D ed explorar, giugar, communitgar in cun l'auter. Sin questa moda pon ins per exempel far sesidas, dar in gieu ensemen u interagir uschiglio socialmain. L'idea da Zuckerberg è da construir in «metaverse» che è in segund mund sper il mund real.