Domat – ina vischnanca cun grondas tradiziuns da baselgia
Fin al di dad oz è la festa da Sontgilcrest a Domat in grond di da festa. Il guardian da notg chanta la damaun il clom da sveglia. I suonda la processiun cun tamburs e schuldads en unifurmas veglias. Lura il servetsch divin festiv. La Televisiun Rumantscha aveva filmà il 1981 il di da Sontgilcrest a Domat.
Eu quét qué super c’als giuvens han ong oz tschaffen da far Sontgalcrést. Schajoc marmugnanè sin tut.
Ina spezialitad a Domat è la decoraziun da la baselgia il di da Sontgilcrest. Quella vegn ornada cun tschupels che vegnan fatgs cun dascha da pigns. Ina gronda lavur cumina che vegn fatga d’insaquantas dunnas da Domat durant plirs dis avant la festa.
Breil – engaschi da la giuventetgna
Per la festa da Sontgilcrest a Breil en Surselva s’engascha era fermamain l’uniun da giuventetgna. Giuvens e giuvnas fan liber il di da Sontgilcrest per pudair prender part a la processiun suenter il servetsch divin. Els ed ellas sa preschentan en unifurmas da festa. E quai che na dastga betg mancar: ils schluppets.
Senza las buis fuss la parada da Sontgilcrest per nus buc la dretga parada.
Sumvitg – parada mo cun umens e mats
Ina veglia tradiziun a Sumvitg è la parada da Sontgilcrest cun umens e giuvens en unifurma. Tar quella parada èn dunnas e giuvnas exclusas. Ina tradiziun ch'è sa mantegnida era en il 21avel tschientaner.
Na, che mattas fan parada, gliez vegness mai en damonda tier nus!
Sontgilcrest ils onns 1990 a Domat
Il Radio Rumantsch aveva accumpagnà in entir di las festivitads da Sontgilcrest en la vischnanca da Domat.
Avais era documents da memoria?
Fotografias, videos u tuns – tar nossaistorgia.ch datti ina massa cuntegn istoric. Has mussaments istorics che ti vulessas parter, forsa era dad ina festa da Sontgilcrest? Lura daventa er ti commember da nossaistorgia.ch!
U avais bellas regurdientschas vid ina festa da Sontgilcrest, ma naginas fotografias? Nagin problem. Raquintai da vossas regurdanzas en furma d'in commentari sutvart. Nus ans legrain sin vossas istorgias.