Meztga per il Grischun Central a Realta Sut
Mintgatant datti en l'economia grischuna era la decentralisaziun. Per exempel l'onn 1999: perquai che la meztga a Cuira aveva serrà sias portas, han ils purs dal Grischun Central decidì da realisar ina atgna chasa da meztga. En quella chasa da meztga a Realta Sut vegniva mo mazzà, l'elavuraziun da la charn dueva succeder en las mazlarias da la regiun.
La mazlaria Joos ad Andeer daventa la mazlaria Viamala
Ina da quellas che elavurava la charn era da lez temp la mazlaria Joos ad Andeer. Il maister mazler Herbet Joos aveva dapi onns emprendists che faschevan mintgamai ils megliers examens d'emprendissadi.
La mazlaria Joos è la fin finala ida en ils mauns dals purs da la Val Schons. Gia in onn suenter la midada dal possessur e dal num è la bilantscha stada positiva.
Absurditads en Surselva ils onns 90
Ils onns 90 vegnan blers animals vendids e transportads en las chasas da meztga grondas da la Bassa – quai malgrà che las mazlarias pitschnas avessan gì capacitads da mazzar ed elavurar quels animals. Perquai èn ils mazlers da la regiun lura era sa sparunads cunter in center da meztga planisà a Glion.
Savognin e Scuol
En quels dus lieus datti mazlarias enconuschentas sur ils cunfins grischuns ora. L'onn 1998 ha la mazlaria Peduzzi a Savognin pudì festivar il giubileum da 60 onns.
Ed a Scuol è la mazlaria Hatecke vegnida undrada l'onn 2005 – na betg per sia charn – mabain per il diever dal rumantsch exemplaric en sia interpresa. Il Rumantsch sco ingredienza economica.
E schizunt concurrenzas internaziunalas hai dà
L'onn 1984 èn 18 mazlers giuvens, tranter quels duas giuvnas da 6 naziuns sa mesirads a la 14avla concurrenza internaziunala da prestaziun per promover la generaziun giuvna da mazlers. L'occurrenza ha gì lieu a Savognin.
