Siglir tar il cuntegn

Header

cuntegn

L'archivar recumonda La libertad sin duas rodas

Il temp da primavaira vegnan las maschinas puspè prendidas ord garascha. Quellas da crom sin duas rodas che fan bler fim e grond fracass: ils töfs e las motos.

Dal vehichel da mintgadi al vehichel dal temp liber

Pli baud era la moto surtut in vehichel per charrar bunmartgà d’in lieu a l’auter. Ozendi è il vehichel da duas rodas per blers in hobi. Strusch ch'ils pass avran vegni charrà sur culms e vals. In viadi cun töf po anc adina dar in sentiment da libertad. Quai sentiment vegn savens partì cun auters en clubs ed uniuns da motociclists.

La libertad totala sin il chopper.
Legenda: La libertad totala sin il chopper. Keystone
La moto munta libertad. Ed exact per quai vai.
Autur: Easy Rider Film american 1969

Clubs da motociclists en il Grischun

En il Grischun existan praticamain en mintga vallada gruppas u clubs da töfs. Per exempel il «Club da Töffs Engiadina Bassa», ils «Grischa Bikers» u il «Grischa Chapter Switzerland». A Cuira datti era in club da Vespas. Ils ultims onns han era ils mopeds vegls puspè chattà ina renaschientscha.

Scuntradas da töfs

Ina sentupada legendara da töfs en il Grischun era quella dal «Fat Tire» sin l’alp Plaun sur Laax. Pervia da mancanza da finanzas è quella vegnida organisada la davosa giada il 2006. Il club dals «Töffists Jauers» aveva fatg part il 1996 ad ina sentupada internaziunala da l’autra vart dal pass dal Stelvio. La Televisiun Rumantscha aveva accumpagnà ils bikers sur il pass.

video
Ils töffists jauers
Or da L’archivar recumonda dals 25.08.1996.
laschar ir. Durada: 5 minutas 57 Secundas.
Per ün töfist es quai musica. Quai nun es ningüna canera. Plü dad at chi’d es i meglder cha quai tuna.
Autur: In motociclist dal club Töffists Jauers

Preveder accidents cun la moto

«Libertad ed individualitad» – è il motto da blers che van cun la moto. Per pudair viver quests sentiments da libertad ed individualitad hai dentant era num da respectar tschertas reglas. La polizia na vul betg mo incassar chastis per motociclists che surpassan la spertadad lubida, mabain era gidar d’evitar accidents. Per exempel il 2011 cun l’occurrenza «Biker-Prävi-Days».

video
Dis da prevenziun per ils motociclists
Or da L’archivar recumonda dals 16.05.2011.
laschar ir. Durada: 2 minutas 28 Secundas.

La fascinaziun töf

L’ir cun töf fascinescha giuven e vegl. Il giuven vul charrar svelt en las stortas, il pli vegl prenda pacific la via sur ils pass cun la Harley Davidson. Tar omadus sesa adina era il privel sin la maschina. Dus motociclists ed ina motociclista avevan raquintà avant passà 30 onns en il Radio Rumantsch da lur passiun sin lur maschinas da duas rodas.

audio
Motto: la moto 1985 Battaporta
ord RTR Audio dals 10.05.2017.
laschar ir. Durada: 36 minutas 37 Secundas.
Seser si davos drova dapli curascha che dad ir sezza cul töf.
Autur: Giuvna Bernardetta Motociclista ils onns 80

Ina passiun per la vita

Ses megliers amis enconuschan el mo sut il num Bimbo. Edwin Schnoz, uschia è ses num burgais. El è gia da pitschen ensi stà fascinà da las maschinas sin duas rodas. Surtut ils fabricats da la Gronda Britannia cun nums sco «Norton» e «Triumph» han attirà ses interess. Il 1996 aveva il Bimbo raquintà en il Radio Rumantsch da sia passiun per ils töfs. Era sia dunna Giuliana aveva gì in pled en chapitel.

audio
Il bimbo e sia passiun per ils töffs 1995
ord RTR Audio dals 10.05.2017.
laschar ir. Durada: 39 minutas 16 Secundas.
In che mava pli baul cun töf era in individualist. In tip tut special.
Autur: Bimbo Töffist passiunà gia da giuven

Artitgels legids il pli savens