Ils onns 90 daventan ils apparats da telefonia mobila cumpacts, cumadaivels e pajabels. Natel, Handy u telefonin numnan ins els. Ins po far cloms e scriver SMS, nagut dapli. Tuttina sa multiplitgeschan be ils abunents da la Swisscom aifer 10 onns per 200%.
Questa telefonia mobila dovra emetturs ils quals sa multiplitgeschan era fermamain. Swisscom, diAx e Sunrise partan il martgà. Mintga firma vul sias atgnas antennas. Quai procura per ina radiaziun electromagnetica da dretg e sanester. Sper consideraziuns da protecziun da la cuntrada èsi era quitads per la sanadad dals abitants che mainan tar protestas e recurs.
En l’archiv RTR sa chattan novitads e reportaschas dal 1999 enfin 2013 che demussan problems d’acceptanza da las antennas en la Rumantschia.
Engiadin’Ota: Puntraschigna, San Murezzan, Bever
Grischun central: Casti, Veulden
Surselva: Laax, Vella, Breil
A Ruschein ha la televisiun rumantscha rapportà durant 5 onns il problem da l'emettur Swisscom da radio, televisiun e telefonia en vischinanza dal vitg.
Jeu che sun pli bia a casa hai savens mal il tgau e sun nervusa e lu hai jeu il desideri dad ir ord casa.
Scientificamein datti oz aunc negin muossament ch’igl ei aschia. Quei che nus savein ei ch’i dat glieud che ei pli sensibla sin camps electromagnetics ni uondas electromagneticas.
Il pur da cultivaziun biologica Wendelin Casutt da Falera ha agì sez e construì ina saiv per proteger sia puraria.
Nus vein sentiu immediat ch’igl ei vegniu meglier. Jeu hai è pli pauc mal il tgau e nus durmin meglier...