Tge far durant in di da malaura? Savens s’inscuntravan ins pli baud en l’ustaria per dar in scart troccas. Quai eran ils temps, cura ch’ins pudeva anc fimar brissagos e parisiennes en locals publics. Il Telesguard ha rimnà il 1982 insaquantas impressiuns dals trochists en in’ustaria a Rabius.
Dar troccas – in gieu per giuven e vegl
Durant il dar troccas èn ils giugaders cun corp ed olma vi dal gieu. In u l’auter auza magari schizunt la vusch, dentant senza malart. Il gieu da troccas è in gieu plaschaivel ed interessant. Durant il tschintschar vegn magari era ditg tschagulas. Il gieu mantegn la buna memoria e promova il contact tranter giuven e vegl.
E nua vegnan las cartas da troccas producidas? Ils Cuntrasts da la Televisiun Rumantscha ha visità il 1996 la manufactura a Schaffusa e discutà cun ils trochists davart lur fascinaziun dal gieu.
Las reglas da dar troccas
Las troccas èn partidas en 4 colurs: bastuns, spadas, rosas e cuppas. Vidlonder vegnan las 21 troccas, ils trumfs. Ed in ch’ins na dastga betg emblidar: la carta da joker, il nar.
Explicaziuns davart il gieu da troccas avevi dà en l’emissiun Cuntrasts il 2005:
Cura quater ein ensemen che capeschan bein il giug, gleiti ein els lu perina, giogan troccas ch’ei dat fiug.
Tarot – leger ord las cartas
Troccas è il pled per il gieu da troccas. Sch’ins discurra da tarot, lura vai per leger ord las cartas. Per exempel l'agen destin u tge ch'il futur porta. Cardientschas blauas u betg? A quella dumonda aveva Anna Ratti dà pled e fatg en l’emissiun Scuntrada dal Radio Rumantsch il 1993:
RR actualitad 11:00